Donald Tramp Saudiya Arabistoniga keldi

AQSh prezidenti Donald Tramp Saudiya Arabistoni poytaxti Ar-Riyodda qirollikning amaldagi rahbari, valiahd shahzoda Muhammad ibn Salmon bilan uchrashdi. Yaqin kunlarda u Yaqin Sharqning yana ikki davlati – Qatar va BAAga tashrif buyurishni rejalashtirmoqda. Bu uning yangi prezidentlik muddati boshlanganidan beri birinchi rasmiy xorijiy tashrifidir.

Tramp va bin Salmonning birinchi uchrashuvidan olingan suratlarda ular Ar-Riyoddagi Qirol Xolid nomidagi aeroportda Saudiya qirollik oilasi a’zolarining portretlari yonida birga o‘tirishgan. Uchrashuvda AQSh davlat kotibi Marko Rubio ham ishtirok etmoqda.

Donald Tramp Ar-Riyodda bugun va ertangi kunning bir qismini o‘tkazishni rejalashtirmoqda. AQSh prezidenti bin Salmon bilan uchrashuvdan so‘ng Citigroup, IBM, Qualcomm, Alphabet va Franklin Templeton kompaniyalari rahbarlari ham ishtirok etadigan Saudiya Arabistoni-Amerika investitsiya forumida qatnashmoqchi. Keyinroq u Fors ko‘rfazi mamlakatlari yetakchilari sammitiga tashrif buyuradi.

Chorshanba kuni sammitdan so‘ng AQSh prezidenti Qatarga jo‘nab ketishi ko‘zda tutilgan. U juma kuni Birlashgan Arab Amirliklariga tashrif buyurib, Yaqin Sharq bo‘ylab safarini yakunlaydi.

Dushanba kuni Tramp 15 may, payshanba kuni Rossiya-Ukraina tinchlik muzokaralari bo‘lib o‘tishi kutilayotgan Istanbulga borishini ham istisno qilmasligini aytdi.

Bunday uchrashuv tashabbusi Rossiya tomonidan bildirildi, biroq Ukraina prezidenti Volodimir Zelenskiy shaxsan Turkiyaga borishini va u yerda Rossiya prezidenti Vladimir Putinni kutishini ma’lum qildi. Kreml Putinning ishtirokini istisno etmagan, lekin hozircha bunday muzokaralar bo‘lib o‘tadimi yoki yo‘qmi va ular qanday formatda o‘tkazilishi mumkinligi aniq emas.

Tramp bilan birga AQSh prezidentining Yaqin Sharq bo‘yicha maxsus vakili Stiv Uitkoff va mudofaa vaziri Pit Hegset ham Yaqin Sharqqa yo‘l oldi.

BBC muxbirlari xabar berishicha, Trampning Yaqin Sharqqa safaridan asosiy maqsad — AQShga qo‘shimcha sarmoyalarni jalb qilishdir.

Bu Trampga o‘z saylovchilariga uning «Birinchi navbatda Amerika» mafkurasi aniq natijalar berayotganini ko‘rsatishga yordam beradi.

AQSh prezidentining tashrifi Tramp dunyoning barcha mamlakatlariga e’lon qilgan savdo urushi fonida bo‘lib o‘tmoqda. Oq uy tomonidan kiritilgan import bojlari jahon savdosini sezilarli darajada izdan chiqardi va AQSh iqtisodiyotining o‘ziga salbiy ta’sir ko‘rsatdi.

Trampning Saudiya Arabistoni, Qatar va BAAga safari uning yangi prezidentlik muddati boshlanganidan beri birinchi rasmiy xorijiy tashrifi bo‘ldi.

Aprel oyi oxirida Tramp Rim papasi Fransiskning dafn marosimi munosabati bilan Italiyaga kelgan, biroq bu safar oldindan rejalashtirilmagan edi.

Saudiya Arabistoni Tramp avvalgi prezidentlik davrida tashrif buyurgan birinchi davlat bo‘lgandi.

Bungacha AQSh prezidentlari birinchi navbatda Kanada yoki Meksika kabi asosiy ittifoqchilarga tashrif buyurishi an’ana tusini olgandi.