“Aholi uy-joy va tomorqasiga yetkazilgan zarar qoplanadi” – “O‘zbekgidroenergo”

Buloqboshi tumanida sodir bo‘lgan suv toshqiniga kanalga “ortiqcha suv tashlangani” emas, me’yordan ortiqcha suv kelgani sabab bo‘lgan. Bu haqda “O‘zbekgidroenergo” AJ ma’lumot berdi.

Ma’lum qilinishicha, Vazirlar Mahkamasining 2021 yil 31 dekabrdagi tegishli qaroriga asosan Rossiya Federatsiyasining “MPR” moliya instituti mablag‘lari hisobiga Janubiy Farg‘ona kanalida “JFK-3 kichik GES qurilishi” loyihasi amalga oshirilmoqda. Loyihaning quvvati 6,9 MVt bo‘lib, yiliga 33 mln kVt.soat elektr energiya ishlab chiqarishga mo‘ljallangan. Qurilish ishlari “tayyor holda topshirish” sharti asosida Rossiyaning “Energosila” kompaniyasi tomonidan amalga oshirilmoqda.

Qurilish ishlari doirasida GES qurish ishlarini tashkil etish hamda vegetatsiya davrida qishloq xo‘jaligini suv bilan ta’minlash maqsadida, Janubiy Farg‘ona kanalida suv to‘sish inshooti qurilib, suv sarfi vaqtincha aylanma kanal orqali quyi qismiga yo‘naltirilgan.

Aylanma kanalning loyihaviy suv o‘tkazish qobiliyati 60 metr kubga mo‘ljallangan bo‘lib, amalda suv sarfi miqdori 70 metr kub kelgan. Buning oqibatida Janubiy Farg‘ona kanalining o‘ng qirg‘og‘ini yuvib ketish holati yuz bergan.

“Hozirda, Janubiy Farg‘ona kanalida yuz bergan texnogen holatni bartaraf etish bo‘yicha barcha chora-tadbirlar amalga oshirilmoqda, ta’mirlash-tiklash ishlari jadallik bilan olib borilmoqda. Buning uchun zarur bo‘lgan barcha texnika va ishchi kuchi resurslari jalb etilgan.

Mazkur chora-tadbirlar joriy yilning 9 may kuni soat 14:00 ga qadar to‘liq bartaraf etiladi, Janubiy Farg‘ona kanalining odatiy ish rejimi tiklanadi”, deyiladi ma’lumotda.

Qayd etilishicha, aholi uy-joy va tomorqa xo‘jaliklariga yetkazilgan zararlar kompensatsiya qilinishi ta’minlanadi.

Avvalroq O‘zgidromet Buloqboshi tumanida sodir bo‘lgan suv toshqiniga Janubiy Farg‘ona kanaliga GES qurilishi uchun ortiqcha suv tashlanishi sabab bo‘lganini ma’lum qilgandi. Hodisa talafotlari o‘rganilganida jami 560 ta xonadonni suv bosgani aniqlangan. FVV esa hodisa oqibatida 30 ta xonadonning ichiga, 70 ta xonadonning esa tomorqasiga suv kirganini bildirdi.