Abu-Dabida Yaqin Sharqdagi birinchi «Disneylend» paydo bo‘ladi

BAAdagi «Disneylend» loyihasini ishlab chiqishga taxminan ikki yil, bog‘ni qurishga esa olti yilga yaqin vaqt ketadi.

Foto: Unsplash

Disney kompaniyasi Yaqin Sharqdagi birinchi tematik bog‘ini quradi. U BAA poytxati Abu-Dabida ochiladi, deb xabar bermoqda kompaniya matbuot xizmati.

Qayd etilishicha, «Disneylend» Yas sun’iy orolidan joy oladi. Loyiha tafsilotlari oshkor etilmayapti. Disney faqat loyihani ishlab chiqishga taxminan ikki yil, bog‘ni qurishga esa olti yilga yaqin vaqt ketishini ma’lum qilgan.

«Abu-Dabidagi «Disneylend» chinakam Disney ruhida bo‘ladi, shu bilan birga, u amirliklarga xos betakrorlikni ham o‘zida aks ettiradi — bu dunyo chorrahasida joylashgan ajoyib Disney o‘yin-kulgi oazisiga aylanadi», — deydi The Walt Disney Company bosh direktori Robert Ayger.

Kompaniyadagilarga ko‘ra, BAAda dunyodagi eng yirik aviatsiya habi joylashgan. Yer aholisining uchdan bir qismi uchun Arab Amirliklariga tashrif buyurish o‘rtacha to‘rt soatni tashkil etadi — mamlakat istiqbolli turistik yo‘nalish hisoblanadi.

Hozirgi kunda dunyoda oltita «Disneylend» mavjud — ular Kaliforniya, Florida, Tokio yaqinidagi Urayasu shahri, Shanxay, Hongkong va Parijda joylashgan.

#BAA #Disney