Yevropa Ittifoqining 16 davlati mudofaa xarajatlarini oshirmoqchi

YeIning 16 davlati, jumladan Germaniya, harbiy xarajatlarni oshirish uchun Barqarorlik va o‘sish paktidagi istisnodan foydalanishga qaror qildi, deb xabar berdi YeI kengashi.

Foto: Hannibal Hanschke / EPA-EFE

Germaniya va Yevropa Ittifoqiga a’zo boshqa 15 davlat mudofaa xarajatlarini oshirish uchun Yevropa Ittifoqining Barqarorlik va o‘sish pakti budjet qoidalaridan istisnodan foydalanishga tayyor. Bu haqda 30 aprel, chorshanba kuni YeI kengashi ma’lum qildi.

Ta’kidlanishicha, Yevrokomissiya mamlakatlarga Bryusselning Yevropa Ittifoqi mudofaa qobiliyatini mustahkamlash rejalari munosabati bilan ushbu imkoniyatdan foydalanishni taklif qilgan. Ko‘rib chiqilayotgan qoida Yevropa Ittifoqiga a’zo davlatlarga to‘rt yil davomida harbiy maqsadlar uchun yalpi ichki mahsulotining 1,5 foizigacha qo‘shimcha qismini, Yevropa Ittifoqi budjeti qoidalarida qo‘yilgan cheklovlarni hisobga olmasdan ajratish imkonini beruvchi paktdir.

Bu cheklovlar, xususan, a’zo mamlakatlarning yillik budjet taqchilligi YaIMning 3 foizidan, umumiy davlat qarzi esa YaIMning 60 foizidan oshmasligini nazarda tutadi. YeI Kengashi ma’lumotlariga ko‘ra, Germaniyadan tashqari Belgiya, Bolgariya, Chexiya, Daniya, Estoniya, Gretsiya, Xorvatiya, Latviya, Litva, Vengriya, Polsha, Portugaliya, Sloveniya, Slovakiya va Finlandiya ushbu qoidalardagi istisnodan foydalanish niyatida. AFP agentligining xabar berishicha, ushbu davlatlarning 12 tasi, jumladan Germaniya ham bu borada rasmiy so‘rov yuborgan. Yana to‘rtta davlat ulardan o‘rnak olish niyatida.

«Biz qo‘shimcha so‘rovlar uchun ochiqmiz», — deya agentlik Yevropa Ittifoqining savdo komissari Valdis Dombrovskisning so‘zlaridan iqtibos keltiradi. Mart oyida YeI, agar Yevropa Ittifoqiga a’zo davlatlar Barqarorlik pakti qoidalaridagi istisnodan foydalansa, 2030 yilga borib YeIda jami mudofaa xarajatlari taxminan 650 milliard yevroga ko‘tarilishi mumkinligini ta’kidladi. Taqqoslash uchun, 2024 yilda Yevropa Ittifoqi davlatlari harbiy ehtiyojlarga jami 326 milliard yevro sarfladi, bu 2021 yildagi 249 milliard yevrodan 31 foizga yuqori.

«Yevropa Ittifoqining qurollanish rejalari Rossiya tahdidi va AQSh qo‘llab-quvvatlashni qisqartirishi fonida ishlab chiqilmoqda», deb yozadi AFP.

#Yevropa Ittifoqi #mudofaa