Isroilning G‘azoda urushni davom ettirishdan boshqa iloji yo‘q - Netanyahu

Isroil bosh vaziri Binyamin Netanyahu o‘z mamlakati G‘azo sektorida janglarni davom ettirishdan boshqa «iloji» yo‘qligini aytdi.

Uning ta’kidlashicha, anklavdagi urush barcha maqsadlar – HAMAS yo‘q qilingan, barcha garovga olinganlar ozod etilgan va kelajakda anklav Isroil uchun xavf tug‘dirmasligi ta’minlangandagina yakunlanadi.

G‘azo Sog‘liqni saqlash vazirligi ma’lumotlariga ko‘ra, so‘nggi ikki kun ichida Isroilning sohilga bergan zarbalari oqibatida kamida 92 nafar falastinlik halok bo‘ldi, 200 nafari yaralandi.

Payshanba kuni HAMAS Isroilning G‘azo sektorida vaqtinchalik o‘t ochishni to‘xtatish haqidagi taklifini rasman rad etdi va Isroilning G‘azodan chiqib ketishi bilan bog‘liq bo‘lmagan har qanday sulhni qabul qilishdan bosh tortish niyatini takrorladi.

18 mart kuni Isroil Qatar, Misr va Qo‘shma Shtatlar vositachiligida tuzilgan o‘t ochishni to‘xtatish kelishuviga barham berganidan beri Isroilning G‘azo bo‘ylab uyushtirgan hujumlari oqibatida 1800 nafarga yaqin odam halok bo‘ldi va 4700 nafarga yaqin kishi jarohatlandi.

G‘azo Sog‘liqni saqlash vazirligi ma’lumotlariga ko‘ra, G‘azo sektorida halok bo‘lganlar soni 51 157 kishiga yetdi. G‘azo sog‘liqni saqlash vazirligi manbalariga tayangan BMT, o‘lim holatlarining uchdan ikki qismidan ko‘prog‘ini ayollar va bolalar tashkil etganini aytadi.

HAMAS hozir 59 nafar isroillikni garovda ushlab turibdi, ulardan 24 nafari tirik ekani taxmin qilinmoqda.