Qamchiq dovonida yuk mashinasi yonib ketdi

Toshkent-O‘sh avtomobil yo‘lida harakatlangan DAF rusumli yuk mashinasida yong‘in chiqdi.

Foto: FVV matbuot xizmati

Favqulodda vaziyatlar vazirligi Qamchiq dovonida yuk mashinasining yonib ketishi bilan bog‘liq holat yuzasidan ma’lumot berdi.

Qayd etilishicha, 15 aprel kuni soat 22:41 da Qamchiq maxsus qidiruv, yong‘in-qutqaruv boshqarmasi navbatchilik qismiga dovondan o‘tgan A-373 Toshkent—O‘sh avtomobil yo‘lining Vodiy—Toshkent yo‘nalishida harakatlangan DAF rusumli yuk mashinasi yonayotgani to‘g‘risida xabar kelib tushgan.

Qutqaruvchilardan iborat ikkita ekipaj aytilgan manzilga soat 22:50 da yetib borgan, soat 22:53 da yong‘in qurshab olingan va soat 23:13 da to‘liq bartaraf etilgan.

«Hozirda yong‘in sababi va moddiy zarar miqdori aniqlanmoqda. Hodisa oqibatida tan jarohati olish va halok bo‘lish holatlari qayd etilmadi», — deyiladi xabarda.

Ta’kidlanishicha, ayni vaqtda Qamchiq dovonida avtomobillarning ikki tomonlama harakati davom etmoqda.

Avvalroq Qamchiqda yukxonadagi elektroskuterda yuz bergan qisqa tutashuv oqibatida Changan yonib ketgani to‘g‘risida xabar berilgandi.

#yong‘in #Qamchiq