Tramp Ukrainadagi urush bo‘yicha muzokaralarning borishini baholadi

AQSh prezidenti Donald Trampning aytishicha, Ukrainadagi urushni tugatish bo‘yicha muzokaralar yaxshi ketayotgan bo‘lishi mumkin, ammo «shunday payt keladiki, unda siz yo jim bo‘lishingiz yoki harakat qilishingiz kerak». Tramp bu bayonotni 12 aprel, shanba kuni, Rossiyadan noroziligini bildirgan va uni kelishuvga erishish uchun «ishlash»ga chaqirganidan bir kun o‘tib bergan.

«O‘ylashimcha, Ukraina va Rossiya o‘rtasidagi vaziyat yaxshi ketayotgan bo‘lsa kerak va buni tez orada bilib olasiz. Shunday nuqta keladiki, siz yo biror narsa qilasiz yoki indamay, nima bo‘lishini kutasiz, lekin menimcha, hammasi yaxshi ketmoqda», — dedi Tramp Air Force One bortida jurnalistlarga.

11 aprel kuni Trampning maxsus vakili Stiv Uitkoff Rossiya prezidenti Vladimir Putin bilan muzokaralar o‘tkazdi. Muzokaralar AQSh va Rossiya o‘rtasida ehtimoliy tinchlik bitimi uchun zarur bo‘lgan Ukrainada o‘t ochishni to‘xtatish bo‘yicha muloqot boshi berk ko‘chaga kirib qolgan, jangovar harakatlarni to‘liq tugatish shartlari bo‘yicha kelishmovchiliklar yuzaga kelgan bir paytda o‘tmoqda.

Tramp sabri tugab borayotganiga ishora qildi va agar Moskva kelishuvni sudrayotganini sezsa, Rossiya neftini sotib oluvchi davlatlarga nisbatan ikkilamchi sanksiyalar qo‘llash imkoniyati haqida gapirdi.

Avvalroq Uitkoff Rossiya prezidentining maxsus vakili Kirill Dmitriyev bilan Vashingtonda o‘tkazgan muzokaralaridan so‘ng Trampga Ukrainada o‘t ochishni to‘xtatishga erishishning eng tezkor yo‘li 2022 yilda anneksiya qilingan Ukrainaning to‘rtta hududi ustidan nazoratni Rossiyaga berish ekanligini aytgan edi.