«Ramshtayn»: Ukraina 21 mlrd yevrolik harbiy yordam oladi

Bu haqda yig‘ilishda chiqish qilgan Buyuk Britaniya mudofaa vaziri Jon Hili ta’kidlab o‘tgan. Unga ko‘ra, 11 aprel kuni e’lon qilingan yangi yordam «Ramshtayn» guruhi doirasidagi eng yirik harbiy ko‘makdir.

«Bugun e’lon qilingan yangi yordam 21 milliard yevrodan oshib ketdi. Bu Ukrainaga ko‘rsatilayotgan harbiy yordam bo‘yicha rekord ko‘rsatkich», — dedi Hili.

«Ramshtayn» yig‘ilishi — bu Ukraina mudofaasi masalalari bo‘yicha Kontakt guruhi doimiy uchrashuvlarining shartli nomi bo‘lib, unda dunyo bo‘ylab o‘nlab davlatlar ishtirok etadi. Ilk bunday yig‘ilish 2022 yili Germaniyadagi Amerika harbiy-havo bazasi «Ramshtayn»da bo‘lib o‘tgan va aynan shu joy nomi keyinchalik butun format uchun umumiy atamaga aylangan.

Ushbu uchrashuvlarning asosiy maqsadi — Ukrainaga Rossiyaga qarshi urushda harbiy yordamni muvofiqlashtirish, mudofaa ehtiyojlarini muhokama qilish, qurol yetkazib berish, harbiylarni tayyorlash va uzoq muddatli qo‘llab-quvvatlashdir.

«Ramshtayn» ishtirokchilari — NATO a’zolari, Yevropa Ittifoqi davlatlari va Ukrainaga ittifoqdosh boshqa mamlakatlardir. Ushbu format Ukrainaga tanklar, havo hujumidan himoya tizimlari, artilleriya va boshqa turdagi qurollarni taqdim etish bo‘yicha qarorlar qabul qilinishida asosiy maydonchaga aylangan.