Prada modalar uyi Versace brendini qariyb 1,4 mlrd dollarga sotib oladi

Mazkur xarid Prada kompaniyasiga taxminan 6 milliard yevro aylanmaga ega konglomerat yaratish imkonini beradi.

Foto: Reuters

Italiyaning Prada modalar uyi Amerikaning Capri Holdings holdingidan 1,375 milliard dollarga Versace brendini sotib olish bo‘yicha kelishuvga erishdi, deb xabar beradi Reuters.

Qayd etilishicha, Prada kompaniya qarzlarini ham qo‘shib sotib oladi. Moda olamidagi ikki yirik kompaniyaning birlashuvi hashamat sanoatida Italiya pozitsiyasini mustahkamlaydi.

«Biz Versace’ning dadil va vaqtga bo‘ysunmaydigan estetikasini zamonaviy talqinda qayta jonlantirib, uning merosini davom ettirishga harakat qilamiz», — deydi Prada direktorlar kengashi raisi Patritsio Bertelli.

AFP’ning yozishicha, Prada’ning Versace modalar uyini sotib olishi kompaniyaga taxminan olti milliard yevro aylanmaga ega konglomerat yaratish imkonini beradi. Bu esa uni fransuz gigantlari LVMH va Kering kabi bozor yetakchilariga raqobatchiga aylantiradi.

Versace modalar uyiga modeler va dizayner Janni Versache tomonidan 1978 yilda asos solingan. 1997 yilda Versace asoschisi o‘ldirilganidan keyin modalar uyi uning singlisi Donatella Versace ixtiyoriga o‘tgan. 2025 yil martda Donatella Versace kreativ direktori lavozimidan ketishi ma’lum bo‘lgan edi.

Prada modalar uyiga 1913 yilda asos solingan. Hozirda unga Miuchcha Prada rahbarlik qilmoqda. Kompaniyaning 80 foizi hozirga qadar Prada oilasiga tegishli.

#Versace #Prada