Rossiya Moldovaning uch diplomatini chiqarib yuboryapti

Moldovaning Moskvadagi elchixonasi uch nafar xodimi persona non grata deb e’lon qilindi va Rossiya hududini tark etishlari shart. Tegishli nota 4 aprel, juma kuni Moldovaning Rossiya Federatsiyasidagi elchisi Lilian Dariyga topshirildi. Rossiya Tashqi ishlar vazirligi bu chora rossiyalik uch diplomatning Kishinyovdan chiqarib yuborilishiga javob sifatida ko‘rilganini ma’lum qildi.

31 mart, dushanba kuni Moldova Tashqi ishlar vazirligi Rossiyaning Kishinyovdagi elchixonasi uch xodimini «diplomatik maqomga to‘g‘ri kelmaydigan faoliyati» uchun chiqarib yuborish haqida buyruq berdi. Moldova rasmiylari Rossiya elchixonasini korrupsiyada va siyosiy partiyalarni noqonuniy moliyalashda ayblanayotgan rossiyaparast deputat Aleksandr Nesterovskiyning tan olinmagan Dnestrbo‘yiga qochib ketishiga yordam berganlikda aybladi.

Moldova razvedkasi ma’lumotlariga ko‘ra, Nesterovskiy Rossiya elchixonasi binosida panoh topgan, shundan so‘ng uni diplomatik raqamlari bo‘lgan mashinada Dnestrbo‘yiga olib ketishgan. Rossiya Tashqi ishlar vazirligi bu ayblovlarni rad etdi. «Rossiya diplomatik vakolatxonasini Moldova Respublikasining ichki ishlariga aralashishda ayblashga urinishlar hech qanday asosga ega emas», — deyiladi Rossiya diplomatik missiyasi bayonotida.

Moldova va Rossiya o‘rtasidagi munosabatlar Rossiyaning Ukrainaga keng ko‘lamli bostirib kirishi boshlanganidan beri o‘ta keskinligicha qolmoqda. So‘nggi yillarda har ikki davlat bir-birining o‘nlab diplomatlarini chiqarib yubordi, deb xabar beradi AFP. Kishinyov bir necha bor Kremlni mamlakat ichki siyosatiga, jumladan, Moldovadagi saylov natijalariga aralashishda ayblagan.