Ryanair rahbarini restoranda masxara qilishdi

Yevropadagi eng yirik arzon aviakompaniya — Ryanair bosh direktori Maykl O’Liri restoranda hazilomuz holatga duch keldi, deb yozmoqda New York Post nashri.

Irlandiyadagi Navan qishlog‘ida joylashgan Luvida restorani xodimlari mashhur mehmonning chekiga «oyoq uchun qo‘shimcha joy» va «yaxshiroq joy uchun to‘lov» ham qo‘shishdi.

O’Liri bu yerda sibas, tost, krevetka va turli ichimliklardan bahra olgan. Biroq asosiy «taom» hisobning o‘zi bo‘ldi: unda «oyoqlar uchun qo‘shimcha joy» — 7,95 yevro, «yaxshiroq joy egallangani uchun to‘lov» — 9,95 yevro, «tinch hududni bron qilish» — 19,95 yevro deb ko‘rsatildi. Jami hisob — 142,30 yevro qilib ko‘rsatilgan.

Taom va xizmatlar to‘liq 142,30 yevroga tushgan bo‘lsa-da, restoran rahbari keyin bu qo‘shimcha haqlarni so‘rashga «yuragi dov bermagani»ni tan oldi. Maykl O’Liri esa hazilni tetik qabul qilib, suratga tushdi va yaxshigina choychaqa ham qoldirdi.

Shu tariqa, restoran jamoasi O’Lirining Ryanair kompaniyasi orqali tanilgan «har bir qulaylik uchun alohida to‘lanadi» siyosatini hazilga oldi. Aytish joiz, bu aviakompaniyada yo‘lovchilar oyoqlar uchun qo‘shimcha kenglik, ustuvorlik bilan samolyotga mindirish, joy tanlash yoki ortiqcha yuk uchun alohida haq to‘laydi.

Ryanair’dagi tizimni real hayotda qo‘llash — restoran uchun qiziqarli PR bo‘ldi, O’Liri uchun esa — ehtimol, bir oz kulgili saboq.