Maktablarda smartfonlarni taqiqlashning o‘zi yetarli emas – tadqiqot

Xalqaro tadqiqot natijalariga ko‘ra, maktablarda smartfonlardan foydalanishni shunchaki taqiqlash kutilgan ijobiy natija bermaydi. 11 davlat vakillaridan iborat olimlar bunday cheklov choralari o‘smirlarning sog‘lig‘ini, uyqu sifatini, o‘quv faoliyatini va dars paytidagi xatti-harakatlarini yaxshilamaydi, degan xulosaga keldi.

Buning o‘rniga tadqiqotchilar bolalar, ota-onalar va o‘qituvchilar uchun zamonaviy texnologiyalardan samarali foydalanish bo‘yicha ta’lim dasturlarini o‘z ichiga olgan kompleks yondashuvni tavsiya qilmoqda.

Tadqiqot Angliyada smartfonlardan foydalanishni cheklash bo‘yicha maktab siyosati samaradorligi baholanganidan so‘ng boshlandi. Natijalar shuni ko‘rsatdiki, cheklovchi choralar nafaqat mavjud muammolarni bartaraf eta olmaydi, balki ba’zi hollarda bolalarda vaqtni boshqarish va diqqatni jamlash ko‘nikmalarini rivojlantirishga to‘sqinlik qiladi. Olimlarning ta’kidlashicha, zamonaviy texnologiyalar kundalik hayotning ajralmas qismiga aylangan va ularni shunchaki chiqarib tashlash konstruktiv yechim emas.

Mutaxassislar maktablarda «raqamli gigiyena» darslarini joriy etishni taklif qilmoqda, bunda bolalarga yotishdan oldin gadjetlardan foydalanishdan voz kechish yoki internetdagi ma’lumotlarni tanqidiy baholash kabi amaliy ko‘nikmalar o‘rgatiladi. Olimlar ota-onalarni ham qo‘llab-quvvatlash zarurligiga alohida e’tibor berishadi, ularning ko‘pchiligi o‘z farzandlari bilan gadjetlar haqida suhbatlashishni bilmaydi.