Ilon Mask X ijtimoiy tarmog‘ini o‘zining xAI kompaniyasiga sotdi

Ilon Mask 28 mart kuni o‘zining sun’iy intellekt xAI kompaniyasi X (sobiq Twitter) ijtimoiy tarmog‘ini 33 milliard dollarga sotib olganini ma’lum qildi.

Mask so‘zlariga ko‘ra, kelishuv natijasida «xAI qiymati 80 milliard dollarga, X esa 33 milliard dollarga (45 milliard dollar minus 12 milliard dollar qarz) baholanadi».

«xAI va X kelajagi bir-biriga bog‘langan. Bugun biz rasman ma’lumotlar, modellar, hisob-kitoblar, distributsiya va iste’dodlarni birlashtirish yo‘lida qadam tashlamoqdamiz», deb qo‘shimcha qildi Mask.

X va xAI vakillari jurnalistlarning so‘rovlariga javob bermadi, deb yozdi Reuters. Agentlikning ta’kidlashicha, kelishuvning ko‘plab tafsilotlari noma’lum, xususan, investorlarga qanday kompensatsiya to‘lanishi va X kompaniyasining rahbarlari yangi kompaniyaga qanday integratsiyalashuvi aniq emas.

Tesla va SpaceX bosh direktori Ilon Mask 2022 yil oktabr oyida Twitter egasiga aylandi va ijtimoiy tarmoqni 44 milliard dollarga sotib oldi. Mask zararga ishlayotgan kompaniyani qayta qurmoqchi ekanini aytdi. 2023 yil aprel oyida Maskning «X corp.» kompaniyasi ijtimoiy tarmoqni qo‘shib oldi va uning nomi X deb o‘zgartirildi.