The Telegraph: Makron Ukrainaga BMT tinchlikparvar kuchlarini yuborish imkoniyatini o‘rganmoqda

Fransiya prezidenti Emmanuel Makron Ukrainadagi potensial tinchlik kelishuvini nazorat qilish uchun BMT missiyasidan foydalanish imkoniyatini o‘rganib chiqmoqda, deb xabar beradi Britaniyaning The Telegraph gazetasi.

Makron tinchlikparvar kuchlarni yuborish mavzusini BMT bosh kotibi Antoniu Guterrish bilan 20 mart kuni o‘tkazilgan Yevropa kengashi sammitida muhokama qilgan.

Nashr ma’lumotlariga ko‘ra, Makron Ukrainaga Yevropa qo‘shinlari kiritilishining muqobil variantlarini «faol o‘rganib chiqmoqda» — bu rejani oldinroq Fransiya prezidenti Buyuk Britaniya bosh vaziri Kir Starmer bilan birgalikda ishlab chiqqandi.

The Telegraph’ning qayd etishicha, BMT tinchlikparvar kuchlari yuborilishini Xavfsizlik Kengashi ma’qullashi kerak, ammo Rossiya va ehtimol, AQSh bu taklifga qarshi chiqishi mumkin.

Emmanuel Makron va Kir Starmer Ukrainada tinchlikni o‘rnatishga urinayotgan NATO va Yevropa Ittifoqi davlatlari guruhi — «Tayyorlar koalitsiyasi»ga boshchilik qilmoqda. Ushbu guruh Ukrainaga Yevropa qo‘shinlarini yuborish rejasini ishlab chiqqan, ammo hozircha nechta davlat o‘z harbiylarini yuborishi va ularning vazifasi nimadan iborat bo‘lishi aniq emas. O‘z navbatida Buyuk Britaniya Ukraina havo makonini himoya qilish uchun qiruvchi samolyotlar yuborishi mumkinligini bildirgan.

Rossiya vakillari Ukrainada har qanday NATO qo‘shinlarining ishtirokini «qabul qilib bo‘lmasligini» bildirgan. Emmanuel Makron esa faqat Ukraina, Rossiya emas, o‘z hududini kim himoya qilishini hal qilishi mumkinligini ta’kidlagan.