Federal tergov byurosi ichki terrorizmga qarshi kurash bo‘limini qisqartirmoqda

AQSh Federal tergov byurosi (FTB) ofisda ichki terrorizmga qarshi kurash bilan shug‘ullanuvchilar shtatini qisqartirdi va ushbu tergovlarni kuzatish uchun ishlatilgan vositadan voz kechdi, deb xabar beradi Reuters.

Agentlik suhbatdoshlarining so‘zlariga ko‘ra, FTB xodimlari ichki terroristik operatsiyalar bo‘limidan boshqa joylarga o‘tkazilmoqda. Ikki manbaning aytishicha, taxminan 16 kishi boshqa joyga o‘tkazilgan. Yana bir manba esa rahbariyatda bo‘limni butunlay tarqatib yuborish masalasi muhokama qilingani, biroq yakuniy qaror hali e’lon qilinmaganini bildirgan.

Shuningdek, FTB ichki terrorizmga oid tergovlarni markirovkalash amaliyotini to‘xtatgan. Reutersʼning yozishicha, ushbu belgilash tizimi xizmatga butun mamlakat bo‘ylab tegishli ishlarni kuzatish va tendensiyalarni aniqlashda muhim vosita bo‘lib xizmat qilgan.

Bundan tashqari, AQSh prezidenti Donald Tramp ma’muriyati FTBning terrorizmga qarshi kurash bo‘yicha qo‘shma tezkor guruhlariga immigratsiya choralarida yordam ko‘rsatishni topshirgan.

Agentlik suhbatdoshlarining xavotiriga ko‘ra, bu o‘zgarishlar FTBning oq tanlilar ustunligini targ‘ib qiluvchi va ekstremistik guruhlardan kelayotgan tahdidlarni kuzatish qobiliyatini zaiflashtirishi mumkin. Ayrim sobiq amaldorlar esa aksincha, o‘zgarayotgan tahdidlardan kelib chiqib resurslarning qayta taqsimlanishi FTB uchun noodatiy holat emasligini aytmoqda.

Jurnalistlarning so‘rovlariga FTB bevosita javob qaytarmagan, biroq byuro, «terrorizm, zo‘ravonlik jinoyatlari, noqonuniy giyohvand moddalar savdosi va kiberhujumlardan AQShni himoya qilish»ga intilayotganini ta’kidlagan.

Avvalroq AQSh mudofaa vaziri Pit Xegset Pentagon va mamlakat armiyasining yuqori rahbariyatiga keyingi besh yilda mudofaa xarajatlarini har yili 8 foizdan qisqartirish bo‘yicha reja ishlab chiqishni buyurgandi.