Sirdaryo viloyati IIB boshlig‘i tayinlandi

Sirdaryo viloyatida ichki ishlar vaziri ishtirokida xalq deputatlari viloyat kengashining navbatdan tashqari sessiyasi bo‘lib o‘tdi.

Sessiya kun tartibiga muvofiq tashkiliy masala ko‘rildi. Ichki ishlar vazirining buyrug‘i bilan Ichki ishlar vazirligi akademiyasining magistratura bosqichi tinglovchisi podpolkovnik Farrux Haydarov Sirdaryo viloyati Ichki ishlar boshqarmasi boshlig‘i lavozimiga tayinlandi.

Majlisda viloyat hududida sodir etilayotgan jinoyatlarning tahlilidan kelib chiqib, kriminogen vaziyatni yanada barqarorlashtirish maqsadida har bir tuman-shahar IIB boshliqlari tomonidan mahallalarni jinoyatchilikdan holi hududlarga aylantirish, aholini rozi qilish, ularning murojaatlarini yechimiga e’tibor qaratish, mavjud muammolarni aniqlash va ularni bartaraf etish bo‘yicha aniq topshiriqlar berildi.

Bundan oldin ichki ishlar vaziri ishtirokida xalq deputatlari Andijon viloyati kengashining navbatdan tashqari sessiyasi tashkil etilgandi.

Sessiyada ichki ishlar vazirining buyrug‘iga asosan Sirdaryo viloyati Ichki ishlar boshqarmasi boshlig‘i sifatida faoliyat ko‘rsatgan polkovnik Sanjar Jabborov Andijon viloyati Ichki ishlar boshqarmasi boshlig‘i lavozimiga tayinlandi.

Sanjar Jabborov 2022 yildan beri Sirdaryo IIB boshlig‘i lavozimida ishlab kelayotgandi.