Daniya qog‘oz xatlardan butunlay voz kechdi

Daniyada 1624 yildan beri xat va jo‘natmalarni yuborish uchun universal pochta xizmati faoliyat ko‘rsatib kelardi, biroq raqamli xizmatlar bozorining rivojlanishi natijasida qog‘oz hujjatlardan foydalanish keskin kamaydi. Bugungi kunda mamlakat dunyodagi eng raqamlashtirilgan davlatlardan biri sanaladi: har qanday ehtiyoj uchun tegishli dasturlar mavjud, hujjatlar smartfonda saqlanadi, hukumat idoralari esa hisob-kitoblarni internet orqali yuboradi.

Aynan shu sababli Daniya pochta xizmati qog‘oz xatlardan butunlay voz kechib, o‘rniga faqat posilkalar yetkazish rejasini e’lon qildi, chunki xat bozori endi daromad keltirmaydi. Masalan, 2000 yildan buyon xatlar soni yiliga 1,4 milliarddan 110 milliongacha kamaygan. Bugungi kunda esa mamlakat aholisining 95 foizi raqamli pochtadan to‘liq foydalanishga o‘tgan.

“Raqamlashtirishning jadal o‘sishi natijasida Daniyada xatlar soni keskin kamayib bormoqda. Shu sababli PostNord 2026 yildan boshlab xat yetkazib berishni to‘xtatadi va o‘z e’tiborini daniyaliklar uchun eng ma’qul pochta jo‘natmalarini yetkazishga qaratadi”, — deyiladi PostNord davlat kompaniyasi bayonotida.

O‘zgarishlar pochta xodimlariga ham ta’sir qiladi. PostNord kompaniyasi 4600 nafar xodimidan kamida 1500 nafarini ishdan bo‘shatishga va ko‘chalardan minglab pochta qutilarini olib tashlashga majbur bo‘ladi. Biroq zarurat tug‘ilganda, odamlar boshqa tashkilotlar orqali xat yuborishi mumkin.

Ayni paytda Yevropaning ko‘plab pochta xizmatlari jadal raqamlashtirish bilan yuzma-yuz kelmoqda. Masalan, Germaniyaning Deutsche Post kompaniyasi xarajatlarni kamaytirish uchun 8000 dan ortiq ish o‘rinlarini qisqartirishiga to‘g‘ri keldi. Buyuk Britaniyaning asosiy pochta biznesi Royal Mail haftaning muqobil kunlarida shoshilinch bo‘lmagan xatlarni yetkazib berish orqali yuz millionlab funtlarni tejashga harakat qilmoqda.