Checheniston va Dog‘istonda Telegram bloklandi

Dog‘iston va Chechenistonda Telegram messenjeri bloklandi. Bu haqda Dog‘iston raqamli rivojlanish vaziri Yuriy Hamzatov ma’lum qildi. Uning ta’kidlashicha, messenjer huquq-tartibot organlari tashabbusi bilan xavfsizlikni ta’minlash maqsadida bloklangan.

«Shimoliy Kavkaz federal okrugining ikki mintaqasi — Checheniston va Dog‘istonda Telegramʼning bloklanishi huquq-tartibot organlarining talabiga ko‘ra, federal darajada qabul qilindi», — deydi Hamzatov.

Uning tushuntirishicha, «dushmanlar messenjerdan tez-tez» mamlakat ichidagi vaziyatni beqarorlashtirishda foydalanib keladi. Vazir bunga 2023 yil Mahachqal’a aeroportida sodir bo‘lgan tartibsizlikni misol sifatida keltirgan. Hamzatov mintaqa aholisiga muqobil platformalarda, xususan, «VKontakte» messenjeridan foydalanishni tavsiya qildi. Shu bilan birga, vazir kelajakda cheklovlar olib tashlanishi mumkinligini ham istisno etmadi.

Dog‘istonda Telegramʼga kirish bilan bog‘liq muammolar 2024 yil kuzda ham kuzatilgan. Foydalanuvchilar xabar va mediafayllarni yuklay olmayotganidan shikoyat qilgandi. Messenjer faoliyatidagi uzilishlar nafaqat Dog‘iston, balki Checheniston va Ingushetiyada ham kuzatilgan. Bu Wildberris atrofidagi mojarolar sabab Checheniston yetakchisi Ramzan Qodirov qonli qasos e’lon qilgan senator Sulaymon Kerimovni qo‘llab-quvvatlash postlari keng tarqalgan vaqtda yuz bergan edi. Rossiya raqamli rivojlanish vaziri Maqsut Shadayev o‘shanda «aloqa bilan biror-bir muammolar borligini» rad etgandi.