AQSh Tramp talablari bajarilmasa, Meksikaga «harbiy harakatlar» bilan tahdid qildi

Pentagon rahbari Pit Hegset Meksikaning oliy harbiy rahbarlari bilan muzokaralar chog‘ida AQSh prezidenti Donald Tramp talablarini bajarishga chaqirdi.

Jumladan, agar Meksika hukumati narkokartellar bilan «kelishuv»ni bartaraf qilmasa, AQSh harbiylari «bir tomonlama chora ko‘rishi»ni aytdi.

The Wall Street Journal nashrining yozishicha, suhbat 31 yanvar kuni o‘tkazilgan va Pentagonning yangi rahbari va Meksika harbiy qo‘mondonligi o‘rtasidagi ilk rasmiy aloqa bo‘lgan.

WSJ manbalarining ta’kidlashicha, Meksika oliy rahbariyati Xegset so‘zlarining ohangidan «hayratda va g‘azabda» qolgan, chunki ular buni mamlakat hududida to‘liq miqyosli harbiy harakatlar boshlash tahdidi sifatida qabul qilgan.

Meksika hukumatining narkokartellar bilan aloqalari korrupsiya, zo‘ravonlik va siyosiy beqarorlikni o‘z ichiga olgan murakkab va ko‘p qatlamli muammodir. Meksika o‘nlab yillar davomida giyohvand kartellari bilan kurashib kelmoqda, biroq ko‘p holatlar korrupsiyaga botgan amaldorlar va xavfsizlik kuchlarining jinoiy guruhlar bilan hamkorlik qilgani yoki ularning faoliyatiga ko‘z yumayotganini ko‘rsatadi.

Ko‘plab politsiyachilar, harbiylar va hatto huquq-tartibot idoralari xodimlarining kartellar bilan aloqasi borligi aniqlangan. Kartellar siyosatchilarning saylov kampaniyalarini himoya qilish yoki «aralashmaslik» evaziga moliyalashtiradi. Ba’zi hududlarda kartellar aslida mahalliy hokimiyatlarni nazorat qiladi va amaldorlarga bosim o‘tkazadi.