O‘zbekiston BMT Xavfsizlik kengashining vaqtinchalik a’zoligiga o‘z nomzodini ilgari surdi

21 fevral kuni O‘zbekistonning BMTdagi doimiy vakili, elchi Ulug‘bek Lapasov Xitoy raisligida BMT Xavfsizlik kengashining ko‘p tomonlama va global boshqaruv institutlarini isloh qilish masalalariga bag‘ishlangan yig‘ilishida ma’ruza bilan ishtirok etdi.

«Dunyo» axborot agentligining ma’lum qilishicha, unda O‘zbekistonning BMT bilan o‘zaro hamkorlikning eng ustuvor masalalari bo‘yicha rasmiy pozitsiyasi xalqaro hamjamiyatga yetkazilgan.

«O‘zbekistonning ko‘p qirrali, global boshqaruvni mustahkamlash va takomillashtirish tarafdori ekanligi alohida ta’kidlandi. Shuningdek, mintaqaviy hamkorlik muhimligi va Afg‘onistonni iqtisodiy tiklashdan manfaatdor ekani qayd etildi.

Mamlakatimiz transmilliy tahdidlarga, jumladan, giyohvandlik moddalarning noqonuniy aylanishi, terrorizm va uyushgan jinoyatchilikka qarshi kurashda BMT bilan hamkorlikni yanada kengaytirishga tayyorligi tasdiqlandi», — deyiladi xabarda.

Shuningdek, a’zo davlatlar 2025 yil iyun oyida Samarqand shahrida bo‘lib o‘tadigan BMTning «Besh yil – 2030 yilgacha: Barqaror kelajak uchun davlat xizmatlarini ko‘rsatishni jadallashtirish» mavzusidagi davlat xizmatlari forumiga taklif qilingan.

Lapasov ma’ruzasida O‘zbekistonning global tinchlik va xavfsizlikni ta’minlash tarafdori ekanligiga urg‘u bergan. Shu nuqtayi nazardan, mamlakatimiz BMT Xavfsizlik kengashining 2035-2036 yillar uchun doimiy bo‘lmagan a’zoligiga o‘z nomzodini ilgari surgani ma’lum qilindi.

Birlashgan Millatlar Tashkiloti (BMT) Xavfsizlik Kengashi 15 ta a’zodan iborat bo‘lib, ularning 5 tasi doimiy, 10 tasi esa ikki yillik muddatga saylanadigan vaqtinchalik a’zolardir. Doimiy a’zolar — veto huquqiga ega, ular AQSh, Buyuk Britaniya, Fransiya, Rossiya va Xitoy. Bu davlatlar BMTga 1945 yildan doimiy a’zo hisoblanadi va har qanday qarorni rad etish huquqiga ega (veto huquqi).

Vaqtinchalik a’zolar ikki yillik muddatga, BMT Bosh Assambleyasi tomonidan mintaqaviy kvotalar asosida saylanadi. Har yili 5 ta yangi davlat saylanib, 5 tasi o‘rnini bo‘shatadi.

Xavfsizlik Kengashi global mojarolarni hal qilish, sanksiyalar qo‘llash, tinchlikparvar missiyalarni yo‘naltirish kabi masalalarda muhim qarorlar qabul qiladi. Kengashning qarorlari majburiy hisoblanadi va barcha BMT a’zolari ularga rioya qilishlari kerak.