HAMAS Isroil bilan kelishuvning birinchi bosqichi shartlarini bajardi

Falastinning HAMAS guruhi garovga olingan 5 nafar isroillikni Qizil Xoch tashkiloti xodimlariga topshirdi, deb yozdi The Times of Israel.

Bu safar ozod qilish jarayonida maxsus tashviqot tadbiri o‘tkazilmadi, garovdagilar turli joylarda Qizil Xoch tashkilotiga berildi.

39 yoshli Tal Shoham va 38 yoshli Aver Mengistu G‘azo janubidagi Rafahda, 27 yoshli Eliya Koen, 23 yoshli Omer Venkert, 22 yoshli Omer Shem-Tov G‘azo sektori markazidagi Nuseyrat qurilish bo‘limida Qizil Xoch xodimlariga topshirildi.

Bundan tashqari, HAMAS 2015 yildan beri asirlikda saqlanayotgan Hishom as-Saidni Isroilga topshirdi.

Avera Mengistu va Hishom as-Said o‘n yildan ko‘proq vaqt davomida HAMAS tomonidan ushlab turildi. Qolgan uch nafari esa 2023 yil 7 oktyabrda guruh jangarilari tomonidan garovga olingan. Mengistu va as-Saidga ruhiy xastalik tashxisi qo‘yilgan. Ular 10 yil avval garovga olinishidan oldin Isroil chegarasi va G‘azo sektorini mustaqil ravishda kesib o‘tgan.

HAMAS Isroil bilan tinchlik kelishuvining birinchi bosqichi doirasida, garovga olingan 33 nafar isroillikning barchasini ozod qildi. Isroil 22 fevral kuni almashinuv doirasida 602 nafar falastinlik mahbusni qamoqdan ozod qildi.

Isroil va HAMAS o‘rtasida o‘t ochishni to‘xtatish kelishuvi yanvar oyidan beri amal qiladi. Kelishuvning birinchi bosqichida HAMAS garovga olingan 33 nafar isroillikni, Isroil esa 1900 nafardan ortiq falastinlik mahbuslarni qamoqxonadan ozod qilish majburiyatini olgan edi.