Daniya mudofaa uchun qo‘shimcha 17 mlrd dollar ajratadi

Daniya hukumati mudofaa ehtiyojlari uchun qo‘shimcha 120 milliard krona (17 milliard dollar) sarflash niyatida. Bu haqda mamlakat mudofaa vaziri Troels Lunn Poulsenga tayanib, Bloomberg xabar berdi.

Daniya hukumatining rejalari haqida AQSh prezidenti Donald Tramp Yevropa davlatlaridan mudofaa xarajatlarini oshirishni talab qilganidan keyin ma’lum bo‘ldi.

Vazirning so‘zlariga ko‘ra, xarajatlarning oshishi joriy va keyingi yilda Daniya mudofaasiga mamlakat YaIMning 3,2 foizi sarflanishini anglatadi. Bundan tashqari, mamlakatda an’anaviy tenderlardan voz kechgan holda qurollar sotib olishni tezlashtirish va Qurolli kuchlarga mablag‘larni nimaga sarflashni mustaqil hal qilish imkoniyatini berish reja qilinmoqda.

«Sotib ol, sotib ol, sotib ol. Mudofaamizni hozir kuchaytirishi mumkin bo‘lgan narsalarni sotib ol va shu orqali bizning tutib turish imkoniyatimizni yaxshila. Eng yaxshisini sotib ololmasang, sifat bo‘yicha ikkinchisini xarid qil», — deydi mudofaa vaziri bilan birga chiqish qilgan bosh vazir Mette Frederiksen.

Yanvar oxirlarida Daniya hukumati Arktika va Shimoliy Atlantikadagi mudofaa maqsadlariga, jumladan, Grenlandiya himoyasi uchun 1,66 milliard dollar investitsiya kiritmoqchi ekani ma’lum qilingandi. Daniya dronlar sotib olish va qo‘shimcha sun’iy yo‘ldosh imkoniyatiga sarmoya kiritish niyatida. Shuningdek, mamlakat to‘rtta Thetis partul kemasini qurollanishga qabul qilishni rejalashtirgan.