Toshkentda 37 tup daraxtni kesib ketgan shaxslarga jinoyat ishi qo‘zg‘atildi

Chilonzor tumani Bo‘rijar kanali bo‘yidagi manzarali, mevali va boshqa turdagi daraxtlar nobud qilindi. Daraxtlarni kesib ketgan 3 kishi aniqlanib, ularga nisbatan jinoyat ishi qo‘zg‘atildi. Tabiatga yetkazilgan zarar miqdori 207 mln so‘mni tashkil qilmoqda.

Bo‘rijar kanali bo‘yidagi daraxtlarni kesib ketgan shaxslar topildi. Bu haqda Kun.uz’ga Chilonzor tuman ekologiya bo‘limi boshlig‘i Shukrullo Abdurahmonov ma’lum qildi.

Uning ta’kidlashicha, hozirda huquqbuzarlarni jinoiy javogarlikka tortish masalasi ko‘rib chiqilmoqda.

“Ushbu noqonuniy harakatni amalga oshirgan fuqarolar aniqlandi. Hozirda tergov jarayonlari olib borilmoqda. Ular jami 37 tup daraxtni tag qismidan kesib ketishgan. Tabiatga zarar miqdori 207 mln so‘mni tashkil qiladi”, deydi Shukrullo Abdurahmonov.

Kanal bo‘yidan daraxtlar kesib ketilayotganligini Kun.uz’ga hududda yashovchi fuqaro bildirgandi. Unga ko‘ra, bu holat bir kunda sodir bo‘lmagan, huquqbuzarlar vaqti-vaqti bilan tunda kelib, 2-3 tadan daraxtni kesib ketavergan.

“Ekilgan daraxtlar hammasi mevali edi, o‘tgan-qaytgan yer edi. Kechasi kelib kesib ketishyapti. Kimligini bilmayman. Bir haftadan beri davom etyapti. Bugun archa yiqilganidan keyin chidolmadim. Keyin ekologiyaga murojaat qildim, arizani qabul qildim dedi, bu yerda kameralar bor, kimligini aniqlasa bo‘ladi. Katta oq tut, olma, o‘rik daraxtlari bor edi. Hammasini kesib, pastga olib tushirib tashlashgan, qo‘shnimda kamera bor, undan chiqmadi, ular boshqa tomondan kelgan deb aytdi. Hech kimdan so‘ragani yo‘q, bu joy davlatga tegishli”, degan edi shu yerda yashovchi Zokir Siddiqov.

Toshkent shahar IIBB axborot xizmatining Kun.uz’ga tasdiqlashicha, daraxtlarni kesganlarga nisbatan Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zgatilgan. Hozirda tergov harakatlari davom etmoqda.