AQShda sudya do‘kon o‘g‘rilarini mashina yuvdirish bilan jazolashni taklif qildi

Michigan shtati sudyasi Jyeffri Klote Walmart do‘konidan narsa o‘g‘irlaganlar uchun noodatiy jazo chorasini taklif qildi. Uning fikricha, supermarket avtoturargohidagi mashinalarni yuvish aybdorlarni o‘z qilmishi haqida o‘ylashga majbur qiladi. Bu haqda Associated Press xabar bermoqda.

Sudya so‘nggi paytlarda chakana o‘g‘riliklar soni nihoyatda oshganidan hayratda. “Bu aqlga sig‘maydi”, — dedi u va bir kunning o‘zida bunday ish bo‘yicha 48 ta ariza kelib tushganini ta’kidladi.

Sudya muammoning g‘ayrioddiy yechimini taklif qildi. Uning fikricha, jamoat ishlarining nostandart shakli — Walmart avtoturargohidagi mashinalarni yuvish odamlarda do‘kondan biror nima o‘g‘irlash istagini so‘ndiradi, qolaversa bu narxlar oshganidan jig‘ibiyron bo‘lgan xaridorlar uchun yoqimli bonusga aylanadi.

“O‘g‘rilik qilayotganlarning hammasi ham yomon odamlar deb o‘ylamayman. Ba’zida odamlarning shunchaki omadi kelmaydi, lekin bu ularning qonunbuzarligini oqlamaydi”, — dedi u.

Walmart rahbariyati ushbu tashabbusni ijobiy qabul qilib, hatto politsiya uchun maxsus avtoturargohlarni ajratib berdi.

Sotuvchilardan birining Associated Press’ga ma’lum qilishicha, shu haftaning o‘zidayoq Michigan shimolidagi Gran-Blank shaharchasidagi do‘konda sodir etilgan mayda o‘g‘rilik uchun “Walmart’da mashina yuvish” jazosi qo‘llana boshlagan. Xodimning aytishicha, bu ishlarga 100 ga yaqin kishi jalb etilishi kutilmoqda. Ular mart va aprel oylarining dam olish kunlarida avtomobillarni yuvishga safarbar etiladi.