Isroil HAMASning Livandagi qo‘mondonini yo‘q qildi

Isroil armiyasi HAMAS harakatining tezkor departamenti boshlig‘i Muhammad Shahin o‘ldirilganini ma’lum qildi. U Livan janubidagi Sayda shahriga berilgan aviazarba oqibatida yo‘q qilingan.

Isroil mudofaa kuchlari (TSAHAL) matbuot xizmatining ma’lum qilishicha, Muhammad Shahin jangovar harakatlarda Livan tomonidan uyushtirilgan raketa zarbalarini boshqargan va «HAMASning muhim xabarchisi» bo‘lgan.

Falastinning HAMAS harakati Muhammad Shahin o‘ldirilganini tasdiqladi. U harakatning «yuqori lavozimlarini» egallagan, ammo boshqa tafsilotlar oshkor etilmadi.

Avvalroq Isroil bosh vaziri Binyamin Netanyahu Isroil armiyasi «HAMASning asosiy qismini» yo‘q qilishga muvaffaq bo‘lgani, ammo TSAHALning ishi hali yakunlanmaganini ma’lum qilgandi. Uning aytishicha, Isroil «HAMASning harbiy va siyosiy potensialini yo‘q qiladi».

Isroil va Falastin harakati o‘rtasida o‘t ochishni to‘xtatish bo‘yicha kelishuvga erishilganiga qaramay, Isroil anklav tashqarisdagi HAMAS a’zolariga hujum qilishni davom etmoqda. Xususan, 27 yanvar kuni Isroil Qurolli kuchlari HAMASning Iordan daryosining g‘arbiy sohilidagi dala komandiri o‘ldirilganini ma’lum qilgandi.

Eslatib o‘tamiz, yanvar boshlarida Isroil G‘azo sektori bo‘ylab yo‘llagan aviazarbalar oqibatida HAMAS tashkil etgan politsiya boshlig‘i Mahmud Saloh hamda uning o‘rinbosari Husam Shohvon halok bo‘lgan edi.