Amerikaning The Washington Post gazetasi muxbirlari yaqinda Ukraina hududiga evakuatsiya qilingan Rossiya Federatsiyasining Kursk oblasti aholisi bilan suhbatlashdi. 12 fevral, chorshanba kuni chop etilgan maqolada aytilishicha, ularning aksariyati 1 fevral kuni Sudjadagi maktab-internat o‘qqa tutilganidan keyin chiqib ketgan.
WP hisob-kitoblariga ko‘ra, so‘nggi bir necha kun ichida Kursk oblastidan 100 dan ortiq tinch aholi Ukraina hududiga evakuatsiya qilingan. Ular orasida mol-mulki bo‘lmagan keksalar ham ko‘p. Ularning aksariyati 1 fevral kuni tinch aholi yashiringan Sudjadagi maktab-internatga uyushtirilgan hujumdan keyin chiqib ketgan. U yerda Kiyev va Moskva bir-birini otishmada aybladi.
Shundan so‘ng Ukraina rasmiylari vayron bo‘lgan bino tasvirlarini e’lon qildi va vayronalar ostida 95 kishi qolganini ma’lum qildi. Oxir-oqibat, to‘rt kishi halok bo‘lgani va to‘rt kishi yaralangani haqida xabar berilgan, qolganlari vayronalar ostidan qutqarilgan. WP ma’lumotlariga ko‘ra, halok bo‘lganlarning yakuniy soni besh kishini tashkil etgan, «noma’lum sonli odamlar vayronalar ostida qolib ketgan».
Kursk oblastidan Ukrainaga evakuatsiya birinchi shunday holat emas
Ukraina hududida Sudjadan evakuatsiya qilinganlarni Qizil Xoch xodimlari kutib oldi. «Kursk oblastidan chegara orqali evakuatsiya rossiyalik tinch aholining mintaqaga bostirib kirish boshlanganidan beri sodir bo‘lgan eng yirik ko‘chishidir», deb yozadi WP.
Uning ma’lumotlariga ko‘ra, Ukraina Qurolli kuchlari avvalroq Ukrainaga ketishni so‘ragan ruslarning kichik guruhlarini, jumladan bolalar, bemorlar va yaradorlarni evakuatsiya qilgan. Keyin Kiyev Moskva bilan ularning ko‘p qismini Belarus orqali Rossiya hududiga qaytarish bo‘yicha muzokaralar olib bordi. Ukraina hukumati yaqinda evakuatsiya qilinganlar uchun ham xuddi shunday choralar ko‘rishga va’da berdi.
Omon qolganlardan biri WP nashriga u Sudjadagi maktab-internat vayronalari ostida 24 soat o‘tirganini aytdi. Yana bir kishi Vladimir Putinni qo‘llab-quvvatlashda davom etishini bildirdi. Nashr evakuatsiya qilinganlarning suratini chop etdi. Kadrlarga qaraganda, ular asosan keksa odamlardir.
