Toshkent viloyatida tabiiy qumni o‘zboshimchalik bilan qazib olganlar ushlandi

Surxondaryo va Toshkent viloyatlarida tabiiy qum xomashyosini o‘zboshimchalik bilan qazib olish holatlari fosh etildi.

Foto: Bosh prokuratura huzuridagi departament

Bosh prokuratura huzuridagi departamentning Termiz tuman bo‘limi tomonidan tergovga qadar tekshiruv o‘tkazilgan.

Unda, fuqaro J.E. va boshqalar o‘zaro til biriktirib, Surxondaryo o‘rmon xo‘jaligi hududidagi 3 gektar yer maydonida 20 ming kub hajmdagi noruda foydali qazilma hisoblangan tabiiy qum xomashyosini o‘zboshimchalik bilan qazib olib, davlat va jamiyat manfaatlariga 2 mlrd so‘m zarar yetkazgani aniqlangan.

Shu kabi, departamentning Bekobod tumani bo‘limi va boshqa huquqni muhofaza qiluvchi organ xodimlari hamkorligida tezkor tadbir o‘tkazilgan.

Unda, “Avangard” massivi hududida fuqaro A.A. va boshqalar o‘zaro til biriktirib, 21,6 ming kub hajmdagi noruda foydali qazilma hisoblangan tabiiy qum xomashyosini o‘zboshimchalik bilan qazib olganliklari aniqlangan.

Mazkur holatlar yuzasidan Jinoyat kodeksining 229-moddasi (o‘zboshimchalik) bilan jinoyat ishlari qo‘zg‘atilib, tergov harakatlari o‘tkazilmoqda.

#Toshkent viloyati #qum