AQShdan Kaliforniya shtatini 1 trillion dollar evaziga sotib olish to‘g‘risidagi petitsiya 200 mingdan ortiq daniyalikning imzosini to‘pladi. U AQSh prezidenti Donald Trampning Daniyadan Grenlandiyani sotib olish taklifiga javoban ishga tushirilgan edi.

«Siz qachondir xaritaga qarab, o‘ylaganmisiz: «Bilasizmi, Daniyaga nima kerak? Ko‘proq quyosh, palmalar va rolikli konkilar»… Keling, Kaliforniyani Donald Trampdan sotib olamiz! Ha, yanglish eshitmadingiz. Kaliforniya bizniki bo‘lishi mumkin», — deyiladi petitsiya chaqirig‘ida.

Petitsiyada Kaliforniyaning bir qator afzalliklari, jumladan, «Yilda 300 quyoshli kun», «texnologik ustunlik», avokado plantatsiyalari va «Disneylend» mavjudligi keltirilgan. Oxirgi nomni esa «Hans Kristian Andersenlend» deb o‘zgartirish taklif qilinmoqda. Murojaat mualliflari buning uchun 1 trillion dollar yig‘ishni taklif qilmoqda.

«Viking shlemidagi Mikki Maus? Ha, marhamat», — deb yozadi petitsiya mualliflari. Kampaniya tashabbuskori Ksave Dyutuaning AR’ga aytishicha, bu g‘oya uning xayoliga Filippinda ta’tilda bo‘lganida — amerikalik sayyoh Trampning Grenlandiya haqidagi taklifini baland ovozda muhokama qilayotganini eshitganida kelgan.

Donald Tramp Grenlandiyani sotib olish AQSh milliy va iqtisodiy xavfsizligi uchun «mutlaq zarurat» ekanini ta’kidlab kelmoqda. Ushbu fonda Grenlandiya bosh vaziri Mute Egede orol aholisi AQSh va Daniyadan mustaqil bo‘lishni xohlayotganini ta’kidladi. Shu bilan birga, u Donald Tramp bilan hamkorlik qilish imkoniyatlarini izlayotganini ma’lum qildi.

Daniya tashqi ishlar vaziri Lars Lyokke Rasmussen AQSh prezidenti Donald Trampning Grenlandiyani egallash rejalari haqidagi bayonotlari orol aholisi manfaatlariga zid ekanini ta’kidlagan. «Tramp Grenlandiyani qo‘lga kirita olmaydi. Grenlandiya — bu Grenlandiya. Grenlandiya aholisi xalqaro huquq va BMT Nizomi bilan himoyalangan xalq», degandi Rasmussen.