Anorbank Toshkent shahri Istiqlol ko‘chasi 21-uyda joylashgan bino-inshootlarni 254,6 mlrd so‘mga xarid qilgan. Bitim 2025 yil 27 yanvar kuni tuzilgan.

Iqtisodchi Otabek Bakirovning e’tibor qaratishicha, mazkur binoda Energetika vazirligi joylashgan, bino «O‘zbekneftegaz» AJning shu’basi Neft Gaz Bino Inshoot MChJ balansida bo‘lgan. 2019 yilda O‘zbekneftegaz bir muddat Qarshi shahriga ko‘chirilgach shahar qoq markazidagi mazkur mashhur bino Energetika vazirligi foydalanuviga o‘tkazib berilgandi.

10 yanvardagi bitimga ko‘ra, Anorbank Energetika vazirligi yonidagi - Shahrisabz ko‘chasi, 85a manzilda joylashgan binoni ham 185 mlrd so‘mga sotib olgan. Bu bino «O‘ztransgaz» AJga tegishli.

«Bank sohasidagi manbalarga ko‘ra, Anorbank energetiklar o‘tirgan binolar o‘rnida bank uchun yangi biznes markazni qurmoqchi. Hisob-kitoblar shakli (bo‘lib to‘lash yoki birato‘la) ochiqlanmagan. Davlat kompaniyalari balansidagi mazkur binolarni sotishda auksion yoki qanaqadir formal tanlov o‘tkazilgani ma’lum emas.

Tijorat banklarining binolari xaridi bo‘yicha prudensial nazoratni amalga oshiruvchi Markaziy bank munosabati ochiqlanmagan. Mazkur bitim yosh bankning likvidliligi va kapitaliga yetarlicha bosim ko‘rsatishi mumkin”, deya yozdi iqtisodchi.

Ma’lumot uchun, 2024 yilning aprel oyida respublika darajasidagi ijro organlari Yangi Toshkent shahriga ko‘chirilib, ularning hozirgi binolari sotilishi e’lon qilingandi. Sotishdan tushgan mablag‘lar Yangi Toshkentda ma’muriy binolar qurishga sarflanadi.