Rossiya Federatsiyasining Kursk oblastidagi olti oylik operatsiya davomida Ukraina qurolli kuchlari 909 nafar rossiyalik harbiyni asirga oldi, bu almashinuv fondini sezilarli darajada to‘ldirdi, deb xabar qildi Bosh shtab 6 fevral, payshanba kuni Facebook ijtimoiy tarmog‘ida. «Bu Rossiya qamoqxonalarida saqlanayotgan yuzlab ukrainalik himoyachilarni vataniga qaytarish imkonini beradi», — deyiladi bayonotda.
Bosh shtab Rossiya qo‘shinlarining Sumi va Xarkiv oblastlariga yangi hujumi oldini olish maqsadida 2024 yil 6 avgustda Kursk operatsiyasi boshlanganini eslatdi. «Kursk oblastidagi 6 oy davomida faol harbiy amaliyotlarda rossiyaliklarning jami yo‘qotishlari taxminan 39,9 ming kishini tashkil etdi, ulardan 16,1 mingga yaqini halok bo‘ldi», deyiladi hisobotda. Bundan tashqari, Bosh shtab ma’lumotlariga ko‘ra, Kursk oblastida Rossiyaning katta hajmdagi texnikasi, jumladan, 131 ta tank, 689 ta zirhli jangovar texnika, 386 ta artilleriya tizimi, 12 ta YaO‘RT bo‘linmasi, 12 ta havo hujumidan mudofaa tizimi, bitta samolyot, uchta vertolyot va 931 ta dron yo‘q qilingan.
Shimoliy Koreya Rossiyaga qo‘shimcha qo‘shinlar yuborishga tayyorlanmoqda
Shimoliy Koreya yetakchisi Kim Chen In bir necha ming shimoliy koreyalik askarini yo‘qotganidan so‘ng Ukrainaga qarshi urushda qatnashish uchun Rossiyaga qo‘shimcha qo‘shin jo‘natishga qaror qildi, deb xabar bermoqda 24 yanvar kuni "Renxap" axborot agentligi Janubiy Koreya shtab boshliqlari birlashgan qo‘mitasiga tayanib.
Departamentning eslatishicha, 11 ming kishidan iborat birinchi guruh yuborilganiga deyarli to‘rt oy bo‘ldi. Bu vaqt ichida u uchdan bir qismga qisqardi va bir nechta Shimoliy Koreya askari asirga olindi. Shunga qaramay, KXDR Rossiya armiyasiga yordam berish uchun qo‘shimcha kuchlar yuborishga tayyorgarlikni kuchaytirdi, deb ta’kidladi qo‘mita.
22 yanvar kuni Pentagondagi yuqori martabali manba The New York Times (NYT) nashriga xuddi shunday ma’lumotni yetkazdi. Unga ko‘ra, Shimoliy Koreya yaqin ikki oy ichida Rossiyaga qo‘shimcha kuchlar yuboradi. Biroq, na Pentagon, na Janubiy Koreya shtab boshliqlari birlashgan qo‘mitasi harbiy xizmatchilar sonini aniqlashtirmadi. Avvalroq Moskva Pxenyanga har bir askar uchun ikki ming dollar to‘layotgani ma’lum qilingandi, bu KXDR fuqarosining 83 yillik maoshiga teng.
