AQSh Adliya vazirligi sanksiyalar ostida qolgan rossiyalik oligarxlarning aktivlarini qidirish bilan shug‘ullanadigan Jo Bayden davrida tuzilgan KleptoCapture ishchi guruhini tarqatib yubordi.

AP agentligining xabar berishicha, Donald Trampning birinchi muddatida Rossiya va boshqa davlatlar tomonidan demokratiyaga putur yetkazish va dezinformatsiya tarqatishga qaratilgan axborot kampaniyalarini kuzatish uchun tuzilgan «Xorijiy ta’sir bo‘yicha ishchi guruh» ham tugatildi.

Bu qarorlar AQSh yangi bosh prokurori Pem Bondi inauguratsiyasidan keyin qabul qilindi. Bosh prokuratura tomonidan Adliya departamenti xodimlariga yuborilgan eslatmaga ko‘ra, hozir tarqatib yuborilgan guruhlarda xizmat qilgan huquqshunoslar «avvalgi lavozimlariga qaytadi va hozir ushbu sa’y-harakatlarga bag‘ishlangan resurslar kartellar va transmilliy jinoiy tashkilotlarni to‘liq yo‘q qilishga yo‘naltiriladi».

AP ta’kidlaganidek, Tramp ma’muriyati har yili Qo‘shma Shtatlarda 70 mingdan ortiq o‘limga olib keladigan fentanil giyohvand moddasi noqonuniy savdosiga qarshi kurashishni ustuvor vazifa qilib olgan.

KleptoCapture 2022 yil mart oyida, Rossiyaning Ukrainaga to‘liq miqyosli bostirib kirishi boshlanganidan so‘ng tashkil etilgan edi. Boshqa narsalar qatorida, guruh xodimlari Sulaymon Kerimov va Viktor Vekselbergning yaxtalarini hibsga oldi, shuningdek, Oleg Deripaska va Konstantin Malofeyev tomonidan sanksiyalar buzilganini aniqladi, deb eslaydi Reuters.