Samarqand viloyati Oqdaryo tumanida yo‘l patrul xodimining qonuniy talabiga bo‘ysunmagan yana bir haydovchiga nisbatan qamoqqa olish ehtiyot chorasi qo‘llandi.

Ijtimoiy tarmoqlarda mashinada eshigidan ushlab olgan YPX xodimi ketayotgani aks etgan video tarqaldi.

Samarqand viloyati YHXX xabariga ko‘ra, 4 fevral kuni soat 19:10 lar atrofida Oqdaryo tumani hududidan o‘tuvchi M37 avtomobil yo‘lining 34-kilometrida xizmat olib borayotgan YPX xodimi to‘xtash va to‘xtab turish qoidalarini buzgan Cobalt’ning yoniga kelib, haydovchidan hujjatlarini so‘ragan.

Biroq haydovchi me’yoriy hujjatlarni taqdim qilmagan va qonuniy talabga bo‘ysunmasdan harakatni davom ettirib ketgan. 

«Kecha men GAI xodimiga hujjat bermasdan, mashinani haydab ketib yubordim. Baribir meni topishdi, ushlashdi. Ichki ishlar organi xodimi oila a’zolari, o‘zidan kechirim so‘rayman. Qilgan ishimdan pushaymonman. Xatolarimdan kerakli saboq chiqardim. Bu hol boshqa takrorlanmaydi.

Yo‘l patrul xizmati xodimidan qochib, oxiri qamoqqacha yetib keldim. Barcha haydovchilarga shuni aytamanki, GAI to‘xtatganida to‘xtasin, menga o‘xshab mana shunaqa vaziyatga tushib qolmasin», — deydi haydovchi ko‘zda yosh bilan.

Holat yuzasidan Jinoyat kodeksining 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 1-qismi bilan jinoyat ishi qo‘zg‘atilgan. Haydovchi protsessual tartibda ushlangan. Hozirda dastlabki tergov harakatlari olib borilmoqda.

Avvalroq Samarqand shahrida Onix haydovchisi YPX inspektorining to‘xtash talabiga e’tibor bermay, uni avtomobil kapotida sudrab qochib ketgandi. Xodim yerga yiqilib jarohat olgan, haydovchi ushlangan.