O‘zbekistonning Buyuk Britaniyadagi elchisi Ravshan Usmonov «Manchester Siti» futbol klubida top surishni boshlagan Abduqodir Husanov bilan uchrashdi, deb xabar beradi «Dunyo» agentligi.

Qayd etilishicha, uchrashuvda yosh o‘zbekistonlikning futboldagi karerasi, o‘zbek diasporasining qo‘llab-quvvatlovi va kelajakdagi rejalar muhokama qilingan.

Elchi Abduqodir Husanov o‘zbek futbolning faxriga aylanganini ta’kidlab, uning eng kuchli ligalardan biridagi yo‘li yosh avlodni ilhomlantirishiga ishonch bildirgan. O‘z navbatida, futbolchi O‘zbekistonni jahon arenalarida sharaf bilan namoyon etish uchun yanada ko‘proq mehnat qilishga va’da bergan.

Shuningdek, uchrashuvda O‘zbekistonda futbolni rivojlantirishga va yosh iqtidorlarni qo‘llab-quvvatlashga yo‘naltirilgan ijtimoiy loyihalar ham muhokama qilingan.

Eslatib o‘tamiz, Shavkat Mirziyoyev yanvar oxirlarida Birlashgan Arab Amirliklariga qilgan safari chog‘ida «Manchester Siti» klubi egalari sanalmish Abu Dabi valiahd shahzodasi Shayx Xolid ibn Muhammad Ol Nahayon bilan uchrashgan edi. O‘zbekiston prezidenti Abu Dabi valiahd shahzodasi Shayx Xolid ibn Muhammad Ol Nahayon bilan uchrashuvda Abduqodir Husanovning «Manchester Siti» klubiga o‘tishi haqida ham suhbatlashgan.

Ma’lumot uchun, Husanov Angliya Premer-ligasida to‘p suradigan ilk o‘zbek futbolchisiga aylandi. U transfer borasida ham o‘zbek futbolchilarining rekordini yangiladi.