Rossiya Poltavani o‘qqa tutdi - fotosuratlar

1 fevral tongida Rossiya harbiylari Ukrainaning bir qancha hududlari bo‘ylab havo zarbalari yo‘lladi. Raketalar va dronlar Poltava, Xarkiv va Zaporijjyadagi turar joylarga zarar yetkazgan. Zaporijjya, Odessa, Sumi, Xmelnitskaya va Kiyev oblastlari ham zarbalar ostida qolgan.

Poltavada Rossiya raketasi besh qavatli uyga kelib urilishi oqibatida halok bo‘lganlar soni 14 kishiga yetdi, ular orasida ikki bola ham bor, deb xabar bergan Ukraina favqulodda vaziyatlar bo‘yicha davlat xizmati.

Yana 17 kishi jarohatlangan, ulardan to‘rt nafari bolalar, deyiladi FVDX xabarida. 22 kishi xarobalar orasidan chiqarib olingan.

Qurbonlardan biri — aktrisa Anastasiya Kolvax. Bu ma’lumotni u ishlagan «Zamonaviy muloqot teatri» tasdiqlagan 

Tarqalgan foto va videolarda zarba besh qavatli uyning pod’yezdini to‘liq yakson etganini ko‘rish mumkin. Xarobalar ostida odamlar qolayotgan bo‘lishi mumkin.

Vayronalarni tozalash va qutqaruv ishlari davom ettirilmoqda. Voqea joyida 460 dan ortiq  qutqaruvchi, kuchishlatar tuzilmalar va kommunal xizmatlar xodimlari ishlamoqda.

«Qurbonlarning yaqinlariga hamdardlik bildiraman. Voqea joyida barcha zarur xizmatlar ish olib bormoqda, qutqarishmoqda va zarur yordamlar ko‘rsatilmoqda», — deya Poltavadagi voqealarga munosabat bildirgan prezident Volodimir Zelenskiy.

Zelenskiy bu zarbalarni «navbatdagi terrorchilik jinoyati» deb atagan va yana bir bor g‘arblik hamkorlarni mamlakatni qo‘llab-quvvatlashni kuchaytirishga, jumladan, qo‘shimcha havo hujumidan mudofaa vositalari yetkazib berishga chaqirgan.

Poltava bo‘ylab zarbalar shanbaga o‘tar kechasi boshlanib, tongga qadar davom etgan, butun Ukraina bo‘ylab dronlar va  raketalar orqali yopirilma hujum uyushtirilganida ro‘y bergan.

Rossiya qo‘shini bu vaqt davomida Poltava oblastiga bir necha bor hujum uyushtirgan.

Poltava oblasti harbiy ma’muriyati Mirgorod rayonidagi energetika infratuzilmalari shikastlangani, natijada 160 dan ortiq xonadon elektr ta’minotidan uzilganini ma’lum qilgan.