Suriyada Bashar Asadning amakivachchasi qo‘lga olindi

U Asad davrida Dar’o viloyati siyosiy xavfsizlik boshqarmasi rahbari lavozimida faoliyat yuritgan. Ta’kidlanishicha, qo‘lga olingan shaxs Suriya xalqiga qarshi amalga oshirilgan jinoyatlarga aloqador insonlardan biri hisoblanadi.

Foto: Syria TV

Suriyaning yangi hukumati sobiq prezident Bashar Asadning amakivachchasini qo‘lga oldi, deb xabar beradi Syria TV telekanali.

«Najib Suriya xalqiga qarshi amalga oshirilgan jinoyatlarga aloqador insonlardan biri hisoblanadi», — deyiladi xabarda.

Latakiya viloyati Jamoat xavfsizligi boshqarmasi direktori podpolkovnik Mustafo Knefatining so‘zlariga ko‘ra, hukumat Suriya xalqiga qarshi jinoyatlarga aloqador shaxslarni javobgarlikka tortish va mintaqada xavfsizlik hamda barqarorlikni ta’minlash bo‘yicha sa’y-harakatlarni amalga oshirmoqda.

Najib Latakiyada ushlangan. Ta’kidlanishicha, u Asad rejimi davrida Suriya janubidagi Dar’o viloyati siyosiy xavfsizlik boshqarmasi rahbari lavozimida faoliyat yuritgan.

Eslatib o‘tamiz, 8 dekabr kuni Suriyada hokimiyat tepasiga «Hay’at Tahrir ash-Shom» guruhi keldi. 10 dekabr kuni Muhammad al-Bashir o‘tish davri hukumati rahbari etib tayinlanganini e’lon qildi. Bashar Asad esa mamlakatdan Rossiyaga qochib ketdi. RF prezidentining matbuot kotibi Dmitriy Peskovga ko‘ra, Asad oilasiga boshpana berish qarorini shaxsan Putinning o‘zi qabul qilgan.

Avvalroq Fransiya tergov sudyalari Suriyaning hokimiyatdan ag‘darilgan yetakchisi Bashar Asadni hibsga olishga order bergandi. U harbiy jinoyatlarga sheriklikda, xususan, fuqarolarga qasddan hujum qilishga aloqadorlikda gumon qilinmoqda.

#Suriya #Bashar Asad

Suriyada qurolli muxolifatning 2024 yil 27 noyabridan boshlangan keng ko‘lamli harbiy harakatlari oradan 12 kun o‘tib, 8 dekabrda Damashqning qulashiga olib keldi. Mamlakatda Asadlar sulolasining 53 yillik hukmronligi yakun topdi.