Belgiya havo hududi va aeronavigatsiya infratuzilmasini nazorat qilishga mas’ul Skeyes aviadispetcherlik kompaniyasining kompyuter tizimida nosozlik yuz berdi.

Qayd etilishicha, shu bois mahalliy vaqt bilan soat 15:00 dan 16:00 gaqadar Belgiya aeroportlaridan birorta ham bort uchib ketmagan va birortasi qo‘nishni amalga oshirmagan — havo kemalari boshqa mamlakatlarga yo‘naltirilgan.

«Skeyes Belgiya havo hududini nazorat qilishda foydalanadigan havo harakatini boshqarish tizimi to‘g‘ri ishlamay qoldi», — deydi Skeyes vakili Kurt Vervilligen.

Het Laatste Nieuws nashri ma’lumotlariga ko‘ra, nosozlik Skeyes ishlaydigan kompyuter tizimini yangilashga urinishdan keyin yuz bergan. Tizim ishdan chiqqan va dispetcherlik markazidagi barcha monitorlar qora ekranni ko‘rsata boshlagan.

Tizim soat 16:00 ga yaqin yana ishlay boshlagan. Belgiya aeroportlaridagi aviaqatnovlar bosqichma-bosqich qayta tiklanmoqda. Ayrim samolyotlar bir necha soatga ushlanib qolmoqda.

Avvalroq American Airlines aviakompaniyasi yo‘lovchi samolyoti Vashingtondagi Ronald Reygan xalqaro aeroportiga yaqinlashayotganda havoda harbiy vertolyot bilan to‘qnashib ketgani to‘g‘risida xabar berilgandi. Samolyot bortida 60 nafar yo‘lovchi va to‘rt nafar ekipaj a’zosi, vertolyotda uch nafar harbiy xizmatchi bo‘lgan.