Latviya va Shvetsiya o‘rtasidagi suvosti kabeliga shikast yetkazishda gumonlangan kema hibsga olindi

Shvetsiya prokuraturasi mamlakatni Latviya bilan bog‘lab turuvchi kabelga shikast yetkazishda gumonlangan kemani hibsga oldi. Bu haqda idora matbuot xizmati xabar berdi.

Prokuratura kema nomi va u qaysi davlatga tegishli ekaniga oydinlik kiritmagan. Ekipaj a’zolari qayerda ekani va ularning maqomi ham ochiqlanmagan.

Katta prokuror Mats Yungkvistning so‘zlariga ko‘ra, tergovda qator davlat hokimiyati organlari, jumladan, politsiyaning milliy tezkor departamenti, sohilni qo‘riqlash xizmati va Shvetsiya Qurolli kuchlari ishtirok etmoqda.

LSM portali oldinroq harbiylar shikast yetkazilgan kabel yaqinida bo‘lgan Michalis San nomli kemani ko‘zdan kechirgani to‘g‘risida xabar bergandi. Latviya dengiz kuchlari qo‘mondoni Maris Polensning aytishicha, kema Rossiya tomon harakatlanayotgan bo‘lgan. «O‘rganish davomida hech qanday shubhali faollik yoki langarning shikastlanishi aniqlanmadi», — degan u.

Polensning qo‘shimcha qilishicha, harbiylar hodisa joyi atrofidagi boshqa kemalar harakatini tahlil qilib, allaqachon ittifoqchilarga mavjud ma’lumotlarni taqdim etgan.

Latviya davlat radio va televideniye markaziga tegishli suvosti optik tolali kabeliga 26 yanvar kuni ertalab shikast yetgan. Uzilishlar Venspils—Gotland hududida qayd etilgan.

Eslatib o‘tamiz, dekabr oyida Finlandiya hukumati Rossiyaning «maxfiy floti» tarkibiga kiruvchi Eagle S tankerini hibsga olgan edi. Ushbu tanker Estlink 2 elektr kabeli va to‘rtta telekommunikatsiya kabeliga langari yordamida shikast yetkazishda gumonlangan. Ba’zi manbalarga ko‘ra, kema NATO floti va samolyotlarini kuzatish uchun josuslik uskunalari bilan jihozlangan.