Qo‘qon davlat pedagogika institutining 3-qavatdan o‘zini tashlagan talabasi vafot etdi

Dekabr o‘rtalarida talaba Qo‘qon davlat pedagogika instituti talabalar turar joyining 3-qavatidan o‘zini pastga tashlagani to‘g‘risida xabar berilgandi. Oliy ta’lim, fan va innovatsiyalar vazirligining ma’lum qilishicha, og‘ir tan jarohati olgan talaba qizga tibbiy yordam ko‘rsatilganiga qaramay, vafot etgan.

Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va jinoyat ishi qo‘zg‘atish rad etilgan. Shuningdek, bunday holatlarning oldini olish maqsadida suitsidga qarshi profilaktika ishlarini kuchaytirish tavsiya etilgan.

«Marhuma qizning dafn marosimi yaqinlari ishtirokida o‘tkazildi. Institut rahbariyati oilasiga moddiy-ma’naviy yordam ko‘rsatib, og‘ir kunlarda ular bilan birga bo‘ldi», — deyiladi vazirlik xabarida.

Hozirda talabalar turar joylarida xavfsizlikni ta’minlash uchun maxsus qoidalar joriy etilgan, kunlik nazorat va psixologik ko‘mak yo‘lga qo‘yilgan. Talabalar bilan keng qamrovli suhbatlar o‘tkazilib, ularning fikrlari o‘rganilgan.

Eslatib o‘tamiz, Qo‘qon davlat pedagogika instituti talabalar yotoqxonasidagi qizlar xonasiga yashirin kamera o‘rnatgani ortidan jamoatchilik e’tiboriga tushgandi. O‘shanda institutning yoshlar masalalari va ma’naviy-ma’rifiy ishlar bo‘yicha birinchi prorektori O.B. MJtKning 46-1-moddasida (shaxsiy hayot daxlsizligini buzish) ko‘rsatilgan ma’muriy huquqbuzarlikni sodir etgan deb topilib, 4,5 mln so‘m miqdorda, institutning ta’lim texnologiyalari markazi xodimlari A.M., B.O. va bo‘lim boshlig‘i R.M. ham ushbu modda bo‘yicha aybdor deb topilib, 3 mln so‘m (har biri) jarima jazosiga tortilgandi.