Temur Kapadze: «Oldimizda mas’uliyatli o‘yinlar turibdi. Biz askarmiz. Vazifa berildi va uni bajarishimiz kerak»

O‘zbekiston milliy jamoasi bosh murabbiyiga aylangan Temur Kapadze O‘FA matbuot xizmatiga o‘z fikrlari bilan o‘rtoqlashdi.

Foto: O‘FA

«Avvalo, Srechko Katanetsga salomatlik tilaymiz. Barchamiz murabbiy boshlagan ishini o‘zi yakunlashini xohlagandik. Ammo sog‘liq birinchi o‘rinda turadi.

Milliy jamoa menga begona emas. O‘ynaganman, bosh murabbiy va yordamchi murabbiy ham bo‘lganman. Biz askarmiz. Vazifa yuklatildi va uni bajarishimiz kerak.

Oldimizda mas’uliyatli o‘yinlar turibdi. Hammasi joyida bo‘ladi, deb o‘ylayman. Murabbiylar shtabi va futbolchilar bilan kirishib ketamiz. Bu yig‘indan unumli foydalanamiz, yangi futbolchilar ham bor. Muhimi — barcha o‘yinchilar martdagi muhim bahslarga yaxshi formada kelishsin. Futbolchilarning kuchi va mahorati jahon chempionati yo‘llanmasini qo‘lga kiritishimizga yetadi. Barchamizning orzumiz bir. Xalqimizdan duoda bo‘lib turishni so‘rab qolaman», — deydi Kapadze.

Eslatib o‘tamiz, Kapadze sog‘lig‘i yomonlashgani bois lavozimini tark etgan Srechko Katanets o‘rnini egalladi. Milliy jamoa yangi murabbiy qo‘l ostida dastlabki o‘yinini 27 yanvar kuni Iordaniyaga qarshi o‘rtoqlik bahsida o‘tkazadi.

#Temur Kapadze #Srechko Katanets