Qashqadaryoda maktab direktori o‘qituvchilarga forma uchun pul yig‘ishga ko‘rsatma berdi

Qashqadaryo viloyati Maktabgacha va maktab ta’limi boshqarmasi o‘qituvchilarga forma uchun pul yig‘ish bo‘yicha ko‘rsatma bergan direktorga chora ko‘rilganini ma’lum qildi.

Ijtimoiy tarmoqlarda Qarshi shahridagi 23-umumta’lim maktab direktori F.Sh. o‘quvchilar formasi uchun pul yig‘imi tashkil etgani tasvirlangan video tarqaldi. U o‘qituvchilarga videomurojaat yo‘llab, 70 mingdan yig‘ishni, formasi yo‘q o‘quvchini esa maktab darvozasidan tashqariga chiqarib yuborishini aytgan.

Holat boshqarma mas’ul xodimlari tomonidan o‘rnatilgan tartibda o‘rganib chiqilgan. Aniqlanishicha, maktab direktori F.Sh. haqiqatan maktab o‘qituvchilariga 2025 yilning 21 yanvar kuni maktabning Telegram guruhiga vedeomurojaat qilib, barcha o‘quvchilarga «jaket» olinishi maqsadida ko‘rsatma bergan.

Natijada, maktab direktori F.Sh.ga nisbatan boshqarma boshlig‘ining 2025 yil 22 yanvardagi tegishli buyrug‘iga asosan o‘rtacha oylik ish haqining 25 foizi miqdorida jarima intizomiy jazo chorasi qo‘llangan. Shuningdek, maktab jamoasiga kelgusida ushbu holatlarga yo‘l qo‘ymaslik bo‘yicha tushuntirish berilib, sinf rahbarlardan tushuntirish xatlari olingan.

«Ta’lim tashkilotida majburiy tartibda o‘quvchilarning forma kiyishiga doir pul mablag‘larini yig‘ish, tashkil etish, qat’iyan taqiqlanadi. Bu kabi salbiy holatlarini Qashqadaryo viloyati Maktabgacha va maktab ta’limi boshqarmasi keskin qoralashini ma’lum qilamiz», — deyiladi murojaatda.

Eslatib o‘tamiz, avgust oyida Maktabgacha va maktab ta’limi vazirligi boshqarma boshlig‘i Azamat Kamolov 2024/2025 o‘quv yilida maktablarda o‘quvchilar uchun majburiy forma joriy etilmasligini ma’lum qilgandi. «Har yili har bir maktab tomonidan o‘z nizomi bo‘yicha belgilangan forma tanlab olinadi. Hozirga qadar o‘quvchilar bir xil forma kiysin, degan qattiq talab qo‘yilmadi. Demak, bu yili ham maktablarda majburiy forma joriy etilmaydi», degandi u.