Yaqin orada Xitoyda yugurish bo‘yicha o‘tkaziladigan yarim marafonda dunyoda birinchi marta robotlar insonlarga jiddiy raqib bo‘ladi, deb yozmoqda South China Morning Post nashri. Ushbu inqilobiy marafon aprel oyida Pekinning Daksin tumanida bo‘lib o‘tishi rejalashtirilgan. Jami 12 000 ishtirokchi 13 mil yoki 21 kilometr masofani bosib o‘tishi kerak, ulardan faqat uchtasi sovrinlarni qo‘lga kiritadi. Shu bilan birga, sportchi-robotlar soni hozircha noma’lum.

Musobaqada qatnashish uchun dunyoning turli kompaniyalari, institutlari va klublariga tegishli robotlarga ruxsat beriladi, ammo ba’zi cheklovlar mavjud. Asosiy talab — qurilma tashqi tomondan odamga o‘xshashi va ikki oyoqda yugurish va yurish uchun mexanik tuzilishga ega bo‘lishi kerak. G‘ildirakli bazasi bo‘lmagan, balandligi 0,5 metrdan 2 metrgacha keladigan robotlar unda qatnasha oladi. Bunda masofadan boshqariladigan hamda to‘liq avtonom mashinalardan foydalanish mumkin, musobaqa davomida esa batareyani almashtirishga ruxsat etiladi.

Bu robotlarning marafonda ishtirok etishiga ruxsat berilgan birinchi holat emas — lekin ilgari ular yo faqat masofaning bir qismini yugurishgan, yoki odamlar bilan bellashmagan. Masalan, Koreyaning RAIBO2 mashinasi bir zaryadda 4 soat davomida 42,2 kilometr masofani bosib o‘tib, chidamlilik bo‘yicha sezilarli rivojlanish ko‘rsatgan. Tiangong roboti esa Pekindagi yarim marafonda ishtirok etib, yuguruvchilarni ruhlantirish maqsadida ularga finish chizig‘ida qo‘shilgan.