Xalqaro tanlovda g‘olib bo‘lgan prezident maktabi o‘quvchilariga BYD sovg‘a qilindi

Saida Mirziyoyeva Abu-Dabi shahrida «Global o‘rta maktablar» nominatsiyasi bo‘yicha g‘oliblikni qo‘lga kiritgan o‘quvchilarga prezident nomidan mukofotlarni topshirdi. Bu haqda u o‘zining Telegramʼdagi kanaliga yozib qoldirdi.

Tantanali tadbirda, shuningdek, O‘zbekiston bosh vaziri Abdulla Aripov, tegishli vazirlik va idoralar rahbarlari ham ishtirok etgan.

«Bugun Abu-Dabi shahrida «Global o‘rta maktablar» nominatsiyasi bo‘yicha Shayx Zoid mukofoti sovrindori bo‘lgan prezident maktabi ikki nafar o‘quvchisining ota-onasi va ustoziga O‘zbekiston prezidenti nomidan mukofotni topshirishdan xursand bo‘ldim.

Bu g‘alaba barcha yoshlarimiz uchun umid va ilhom ramzidir. Biz Siz bilan faxrlanamiz», — deb yozadi Saida Mirziyoyeva.

Prezident maktabi o‘quvchilari va ularning ustoziga BYD avtomobillari ham topshirilgan.

Tanlovda maktab o‘quvchilari Pahlavon G‘ulomov va Asilbek Ashrapov hamda ularning ustozi Sohibxon Azizovning yomg‘ir suvini ichishga yaroqli darajagacha qayta ishlash loyihasi g‘alabani qo‘lga kiritgan. Ta’kidlanishicha, tanlovga 156 ta davlatdan jami 5980 ta ariza kelib tushgan.

14 yanvar kuni Abu-Dabida mukofotni o‘quvchilarga Birlashgan Arab Amirliklari prezidenti Shayx Muhammad bin Zoid Ol Nahayon shaxsan topshirgan edi. Taqdirlash marosimida O‘zbekiston prezidenti Shavkat Mirziyoyev ham ishtirok etgan.