Rim papasi Fransisk mart oyidan rohiba Rafaella Petrini Vatikan gubernatori etib tayinlanishi haqida e’lon qildi. U ushbu lavozimni egallagan birinchi ayol bo‘ladi, deb yozmoqda Vatican News.

Rim papasi Italiyaning Nove telekanalida efirga uzatiladigan ko‘rsatuvida o‘z niyatini ma’lum qilgan. Rafaella Petrini 2021 yildan buyon Vatikan shahar davlat gubernatorligining bosh kotibi lavozimini egallab kelmoqda.

“Ayollar bizdan ko‘ra yaxshiroq uddalaydi”, - deb ta’kidladi Fransisk Vatikanda ayollarga berilgan vazifalar haqida so‘z yuritarkan.

55 yoshli Petrini 2021 yildan beri bu lavozimda faoliyat yuritayotgan 79 yoshli kardinal Fernando Verges Alsaganing o‘rnini egallaydi.

Gubernatorlik lavozimini egallagan shaxs amalda davlat hukumatining rahbari hisoblanadi va bosh vazir vakolatlariga ega bo‘ladi, shuningdek, Rim papasi nomidan Vatikanni boshqaradi.