Toshkent metropolitenida 19 yoshli yigit o‘zini poyezd ostiga tashladi. Bu haqda Bosh prokuratura axborot xizmati rahbari Kun.uz’ga ma’lum qildi.

Qayd etilishicha, 17 yanvar kuni soat 22:40 larda Qo‘yliq yo‘lining «Turon—Do‘stlik» yo‘nalishida harakatlanayotgan elektropoyezd «Olmos» bekatiga kirib kelayotgan vaqtida, 2006 yilda tug‘ilgan yigit o‘zini uning ostiga tashlagan.

Bekatda xizmat olib borayotgan naryad xodimlari jabrlangan fuqaroni vagon tagidan chiqarib olgan. Yigit tibbiy yordam ko‘rsatish maqsadida shifoxonaga yuborilgan.

Ta’kidlanishicha, hozirda tergovga qadar tekshiruv harakatlari olib borilmoqda.

Eslatib o‘tamiz, 2022 yil fevralda poytaxt metopolitenining «Mirzo Ulug‘bek» bekatida o‘zini poyezd tagiga tashlagan erkak voqea joyida vafot etgandi. 2023 yilda «Qo‘yliq» bekatida ham shu kabi holat yuz bergan — bir erkak o‘zini poyezd tagiga tashlagan edi.