Kaliforniyadagi Moss Landing Power Plant elektr stansiyasida 16 yanvar kuni kuchli yong‘in boshlandi. Elektr stansiyasida dunyodagi eng yirik energiya to‘plagich joylashgan — akkumulyatorlarning umumiy quvvati 750 megavattni tashkil etadi.

Qayd etilishicha, yong‘in 300 megavattli saqlagichlar joylashgan binodan boshlangan. Ushbu yong‘in ulkan akkumulyatorlarning yonib ketishi ehtimoli sabab juda xavfli hisoblanadi. Hudud rasmiylari hozircha 1,5 ming kishini evakuatsiya qilgan, shuningdek, bino yaqinidan o‘tuvchi Highway 1 shossesini yopib qo‘ygan.

Mahalliy OAV ma’lumotlariga ko‘ra, yong‘in bir kun oldin boshlangan bo‘lsa-da, alangan kuchi so‘nmagan, elektr stansiyasi atrofini qora tutun qoplagan. Moss Landing Power Plant stansiyasi Vistra energetika kompaniyasiga tegishli. 2020 va 2021 yillarda ham elektr stansiyasi hududida yong‘inlar yuz bergan, ammo ular tezda o‘chirilgan edi.

Hozirda yuz berayotgan yong‘in nima sababdan yuzaga kelgani ma’lum qilinmadi. Vistra’ga ko‘ra, yong‘in boshlanishi bilan elektr stansiyasi xodimlari evakuatsiya qilingan va u o‘chirilishi bilan tergov harakatlari boshlanadi.

Eslatib o‘tamiz, Kaliforniyadagi o‘rmon yong‘inlari davom etmoqda. Hozirga qadar yong‘inlar oqibatida kamida 25 kishi halok bo‘lgan. AQSh prezidenti Jo Bayden Kaliforniyadagi o‘rmon yong‘inlari qurbonlariga federal yordam ko‘rsatish uchun ushbu yerlarni falokat hududi deb e’lon qilgan.