Germaniya qurol tarqatuvchisi Hans Wrage & Co. GmbH o‘zi yetkazib bergan qurollar uchinchi davlatlar orqali Rossiyaga yetib kelayotgani haqidagi ma’lumotni rad etdi. Kompaniya 14 yanvar, seshanba kuni DW'ga eksklyuziv izoh yubordi.
Dekabr oyida bir guruh xalqaro ommaviy axborot vositalari Rossiya qanday qilib sanksiyalarni chetlab o‘tib, sobiq SSSR davlatlari orqali Yevropa Ittifoqi va AQShdan snayper miltiqlari va o‘q-dorilarini olishda davom etayotgani haqidagi surishtiruvni chop etdi. Material The Insider (Rossiya), Investigace (Chexiya), IrpiMedia (Italiya) va "Vlast" (Qozog‘iston) jurnalistlari tomonidan tayyorlangan. Matnda turli G‘arb kompaniyalari, masalan, Lyuksemburgdagi Beretta holdingi, shuningdek, Rossiya Federatsiyasiga qurol-yarog‘lar kirib kelayotgan sobiq SSSRning bir qancha davlatlari sanab o‘tilgan.
Hans Wrage & Co'ga qarshi ayblovlar
Surishtiruv shuni ko‘rsatdiki, Germaniya qurol ishlab chiqaruvchilari orasida Hamburgdagi Hans Wrage & Co firmasi Rossiya Federatsiyasi bilan aloqalarni saqlab turadi. Uning rahbari Frauke Lyoman Rossiyaning "Rusimpeks" qurol kompaniyasining 15,96 foiz aksiyalariga egalik qiladi, deb xabar berdi OAV. Ular Ukrainadagi urushga qaramay, "Rusimpeks" Rossiya Federatsiyasiga Miroku yapon karabinlarini, Germaniyaning Anschütz, Krieghoff ov miltiqlarini, Ruag Ammotec va RWS patronlarini, shu jumladan, harbiy kalibrdagilarni import qilishni davom ettirayotganini yozdi.
Ommaviy axborot vositalarining ta’kidlashicha, Hans Wrage'ning o‘zi Rossiya Federatsiyasiga to‘g‘ridan to‘g‘ri qurol va o‘q-dorilarni sotishdan bosh tortgan, ammo pnevmatik o‘qlar, qurol qutilari, ov kiyimi va poyabzallarini yetkazib berishda davom etmoqda. Bundan tashqari, 2022-2023 yillarda Hans Wrage Qozog‘istonga kamida 309 ta Italiyaning Benelli ov miltig‘i va 176 ta Germaniyaning Blaser karabinlarini yetkazib bergan. The Insider yozganidek, ularning ba’zilari o‘sha yerdan Rossiyaga yuborilgan.
