AQSh prezidentligidan ketayotgan Jo Bayden 15 yanvar kuni millatga xayrlashuv murojaati bilan chiqadi. Uning Oval kabinetdan chiqishi mahalliy vaqt bilan soat 20:00 ga (Toshkent vaqti bilan 16 yanvar 4:00) rejalashtirilgan, deb xabar berdi Oq uy rasmiy sayti 10 yanvar, juma kuni.

Press-relizda tafsilotlar keltirilmagan, ammo xayrlashuv nutqi AQShda lavozimini tark etayotgan prezidentlar uchun an’anaga aylangan. Shu tariqa, noyabr oyida bo‘lib o‘tgan prezidentlik saylovlarida Oq uy rahbari etib saylangan Donald Tramp birinchi prezidentlik muddati yakunida xayrlashuv nutqining katta qismini o‘z ma’muriyati siyosatining muvaffaqiyatlari deb hisoblagan jihatlarga bag‘ishladi. Xususan, Tramp «birorta ham urush boshlamaganini», biroq ayni paytda Xitoyga to‘qnash kelganini va «AQShning boshqa davlatlar bilan ittifoqlarini tiklaganini» aytdi.

10 yanvar kuni Jo Bayden AQSh prezidenti sifatidagi so‘nggi suhbatlaridan birini Ukraina prezidenti Volodimir Zelenskiy bilan o‘tkazdi. Zelenskiyning so‘zlariga ko‘ra, Bayden «Ukraina mustaqilligini saqlab qolish va himoya qilish butun Yevropa va demokratik dunyo uchun muhim» ekanini yana bir bor ta’kidladi. Uning millatga xayrlashuv murojaatda ham shu mavzuga to‘xtalishi kutilmoqda.

Avvalroq Jo Bayden AQSh yetakchisi sifatida Yevropa Ittifoqiga so‘nggi safarini bekor qilgandi — uning Italiyaga tashrifi 9-12 yanvar kunlariga mo‘ljallangan edi. Bunga Kaliforniyada davom etayotgan keng ko‘lamli yong‘inlar sabab bo‘ldi, Baydenning o‘zi mahalliy qutqaruvchilar bilan uchrashgandan so‘ng uni mintaqa tarixidagi eng dahshatlisi deb atadi.