Namangan viloyati Pop tumani favqulodda vaziyatlar bo‘limi boshlig‘i tezkor tadbirda qo‘lga olindi. Bu haqda O‘zA xabar berdi.

Ma’lum qilinishicha, bo‘lim boshlig‘ining oila a’zolariga tuman hokimining 2021 yil fevral oyidagi qarori bilan limon yetishtirish uchun issiqxona tashkil etish maqsadida 2 gektar yer maydoni ajratib berilgan. FVB boshlig‘i ushbu yer maydonini mansabdor tanishlari orqali xaridor nomiga rasmiylashtirib berish hamda u yerda kottej tipidagi uy-joylar qurishi uchun ruxsat olib berish evaziga 160 ming dollar olgan vaqtida huquqni muhofaza qiluvchi organlar tomonidan o‘tkazilgan tezkor tadbirda ushlangan.

Hozirda unga nisbatan Jinoyat kodeksining 25, 168-moddasi (Firibgarlik) 4-qismi “a” bandi va 28, 211-moddasi (Pora berish) 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.

Shuningdek, huquqni muhofaza qiluvchi organlar tomonidan o‘tkazilgan tezkor tadbirda Sirdaryo viloyati Sayxunobod tumani FVB tezkor bo‘linmasi boshlig‘i ham 7 ming dollar bilan ushlangan. U ushbu pul evaziga Guliston shahrida yashovchi 30 yoshli fuqaroga uni o‘zining mansabdor tanishlari orqali shahar favqulodda vaziyatlar bo‘limiga ishga kiritib qo‘yishni va’da qilgan.

Bo‘linma boshlig‘iga nisbatan Jinoyat kodeksining 168-moddasi 3-qismi “v” bandi va 28, 211-moddasi 1-qismi bilan jinoyat ishi qo‘zg‘atilgan.

Avvalroq Samarqand viloyati IIB tezkor xodimi 10 ming dollar bilan ushlangani xabar qilingandi.