Elektr ta’minotidagi uzilishlar tufayli tan olinmagan Dnestrbo‘yining ayrim hududlarida suv ta’minoti to‘xtashi mumkin. Bu haqda 5 yanvar, yakshanba kuni NewsMaker nashri xabar berdi.
Shunday qilib, 4 yanvar kuni Tiraspolning tumanlaridan biri suvsiz qoldi. Shaharning boshqa hududlarida, shuningdek, Benderida ko‘p qavatli uylarning yuqori qavatlari aholisi muammoga duch kelishi mumkin, deya ma’lum qildi mahalliy hokimiyat.
Dnestrning chap qirg‘og‘ida Moldaviya (Kuchurgan) davlat mintaqaviy elektr stansiyasi (GRES) va Dubosar GES tomonidan ishlab chiqarilgan elektr energiyasi yetarli emas, deb ta’kidlandi Kishinyovda.
Dnestrbo‘yida elektr energiyasini rejali tarzda o‘chirish boshlandi
Tan olinmagan Dnestrbo‘yi hududi aholisi elektr ta’minotidagi uzilishlar haqida ogohlantirildi. Tegishli xabar 3 yanvar kuni Telegramʼda hududiy «Iqtisodiy rivojlanish vazirligi» tomonidan e’lon qilindi.
O‘chirishlar aholining «hozirda elektrni tarmoq ishlab chiqarganidan ko‘ra ko‘proq iste’mol qilishi» bilan bog‘liq. Uzilishlar Tiraspol, Benderining bir qator rayonlari, Kamenki shahrining sanoat sektori, Ribnitsa va uning atrofidagi rayonlar, shuningdek, Giska qishlog‘iga ta’sir qiladi.
Ba’zi aholi punktlariga yetkazib berish mahalliy vaqt bilan soat 18.00 dan 22.00 gacha (Toshkent vaqti bilan 21.00 dan 01.00 gacha) davrda bir soat davomida to‘xtatiladi. Bunday holda, belgilangan muddat «texnologik jarayon»ning o‘ziga xos xususiyatlaridan kelib chiqqan holda 30 daqiqaga oshirilishi mumkin.
