AQShning saylangan prezidenti Donald Tramp 2024 yil noyabrdagi saylovlarda g‘alaba qozonganidan keyin donorlardan 200 million dollardan ziyod mablag‘ to‘pladi, deb xabar bermoqda The New York Times.

«Tramp noyabr oyida saylovlarda g‘alaba qozonganidan keyin uning ittifoqchilari ko‘p sonli donorlardan 200 milliondan ziyod mablag‘ to‘pladi. Ushub pullar uning inauguratsiyasi, siyosiy vazifalarni bajarishiga, shuningdek, prezident kutubxonasining ochilishiga sarflanishi mumkin», — deb yozadi gazeta.

Donorlar orasida Pfizer, Amazon, OpenAI, shuningdek, kriptovaluta bilan shug‘ullanuvchi kompaniyalar ham bor.

Trampning inauguratsiyasi bilan shug‘ullanuvchi qo‘mitaning o‘zi donorlardan kamida 150 million dollar to‘plagan bo‘lib, bu yaqin haftalarda yana oshishi kutilmoqda. To‘plangan mablag‘lar Tramp 2017 yilda o‘rnatgan rekorddan sezilarli darajada ko‘p: o‘shanda u inauguratsiya xarajatlari uchun 107 million dollar to‘plashga muvaffaq bo‘lgandi.

Bundan tashqari, Tramp tomonidan shakllantirilgan boshqa qo‘mitalar ham donorlardan mablag‘ olmoqda. Xususan, ular mablag‘larni Trampga yaqin bo‘lgan siyosatchilarni qo‘llab-quvvatlashga va ularning saylovoldi tadbirlarini moliyalashtirishga sarflash niyatida.

Avvalroq Apple bosh direktori Tim Kuk AQShning saylangan prezidenti Donald Tramp inauguratsiya jamg‘armasiga shaxsan 1 million dollar xayriya qilishi to‘g‘risida xabar berilgandi.